Colegio Laura Wernet-Paskel a cumpli 60 aña di existencia

Colegio Laura Wernet-Paskel (CLWP) a cumpli 60 aña di existencia na maart di e aña aki. Na juli nos a celebra na nivel di scol cu e alumnonan nos di 12 lustro cu un Santo Sacrificio di Misa pa tur nos alumnonan cu un bishita na cinema y celebracion na scol.

E fin di siman cu a pasa nos a celebra. Nos a habri e fin di siman cu un fiesta organisa pa Sharine Geerman, Roy Angela y CLWP.  Aki a recauda fondo pa sigui cu nos proyecto di un Biblioteca y un espacio multifuncional pa scol y pa bario di Santa Cruz.

Un tremendo fiesta. Un exito rotundo. Nos a gradici Sharine Geerman cu semper a coopera pa recauda fondo pa e proyecto pa medio di un plakaat. Diadomingo nos a habri cu un Santo Sacrificio di Misa na unda nos a conmemora 60 aña di fayecimento di e Gran Dama Laura Wernet Paskel, cu nos scol ta carga su nomber cu orguyo.

Tambe pa gradici y celebra añanan di servicio di dos colega, 25 aña di juffrouw Winifred Kaarsbaan y 30 aña di juffrouw Milène Croes y nos 60 aña di scol. 

Despues di e Santo Sacrificio di Misa a sigui un ceremonia cu ponemento di krans na graf di Laura, na unda di parti di famia Rudy Lampe a hiba palabra y di parti di scol cabesante Juffrouw Bernadetta Figaroa-Geerman. 

Aki nos a conmemora Laura su fecha di fayecimento, na unda nos a pone enfasis riba e bida remarcabel di Laura d.f.m. Nos a para keto na su memoria pa reflexiona con significante su bida tabata. E tabata pionero riba diferente tereno, E tabata un di e prome ser femenino cu a bay studia na Hulanda pa maestro. Un di e prome dama cu a subi lista politico y cu a lucha na Aruba pa hende muhenan tambe tin un stem riba nivel gubernamental y haya derecho di voto. E tabata core riba su scooter pa bay su trabou. E tabata tin un biblioteca na su cas na unda e tabata fia buki na pueblo, frere, pastoor y souernan. 

Laura a laga un manuscrito atras cu despues a publica na un buki cu ta hiba e titulo, ‘Ons Eilandje’ na unda na un manera bunita a discribi e bida di antaño di Aruba. Nos tabata honra cu presencia di e dos yiunan di Laura d.f.m., cu ta  Andres (Dechi) y Inca Wernet, cu ta su unico yiu muher. 

Prome Minister, Evelyn Wever-Croes a honra nos cu su presencia. Tambe minister di Enseñansa y Deporte, Endy Croes y director di SKOA, Anuesca Baly. 

Nos a cera e mainta aki cu un brindis na Centro San Martin, unda nos a celebra nos 60 aña di existencia, nos hubilarionan y e bida significante di e dama na ken nos scol ta nombra. Nos ta gradici Betty Werleman cu su nieta Nealeny Tromp cu a deleita nos e mainta aki cu propio composicion riba tambu.

Aki Dechi Wernet, a sorpresa nos Prome Minister, e director di SKOA y e cabesante di CLWP cu  un regalo di un edicion di e corant Antiliaans Dagblad na unda a sali e prome parti di e ‘Ode aan Laura Wernet-Paskel” cu e escritor Henry Habibe a dedica na Laura d.f.m.

Merecidamente a nombr’e aki,  banda di Betico Croes cu ta e figura masculino di milenio, como e figura femenino di milenio.

Nos ta gradici Elias Aarab, un docente di Ingles di 37 aña, di descendiente Arubano,

biba na Hulanda cu a entrega un peticion na Hulanda pa nombra un caya na Laura Wernet-Paskel, cu Hulanda a acepta.

 E coronacion riba e bida remarcabel cu Laura Wernet-Paskel d.f.m. a hiba ta e dedicacion aki di un caya na Hulanda, Den Haag na su nomber.