Coder Dojo ta tene diferente sesion educativo na biblioteca

Mentor y coordinador di Coder Dojo, Thanya Croes, y fundado y mentor, Bruce Harms, ta gradici directora di biblioteca, Astrid Britten, y ta hopi contento cu e cooperacion cu biblioteca publico. Tanto biblioteca na Playa como San Nicolas ta facilita e sesionnan di Coder Dojo pa un y tur.

Full Stack Vision Foundation a cuminsa cu un ‘Coder Dojo’ na biblioteca como un aña pasa. Kico esaki ta? Un Coder Dojo ta duna mucha oportunidad pa siña traha codigo, desaroya website, apps, programa y wega riba computer y tambe computer engineering.

E muchanan cu ta bay un ‘Coder Dojo’ ta experimenta traha diferente cos y ta explora e tecnologia na un manera creativo. E muchanan ta traha cu otro riba diferente proyecto. E mayornan interesa pa nan yiu join por lesa mas riba www.arucoderdojo.org of bishita ‘arucoderdojo’ riba Facebook. E proximo sesion di Coder Dojo ta dia 10 di januari 2023 na biblioteca na Playa.