Clifford Heyliger (AVP): E crisis di mas grandi yama “abuso di mucha”

Mundo ta pasando door di tempo dificil. Prijs halto di combustibel, inflacion for di proporcion, reto logistico, falta di material y producto prima y asina mi por menciona varios mas. Tur e temanan aki ta kita nos atencion di e crisis mas grandi cu Aruba a yega di enfrenta cu ta e abuso di nos yiunan.

Ta parce cu nos pais a degenera asina hopi cu abuso di mucha ta normal unda ni sociedad ni politico nan ta worry pa atende cu ne. Desde ki dia e bienestar di nos yiunan a bira secundario?  Nos ta grita y bati na pecho cu derecho di mucha ta sagrado y cu derecho di educacion ta un derecho fundamental. Pero e realidad ta cu nos no ta mehorando e siguridad di nos yiunan y nos ta hortando e mucha di un educacion pa motibo di aircogeld. Nos mester tin berguensa cu esaki ta e situacion na Aruba.

Nos yiunan ta sufriendo pasobra un monster ta destrui nan bida. Nan ta keda sin personalidad, vulnerabel, deprimi, y mas tristo. Cu tur ta nan inociencia y nan “childhood” ta wordo horta di nan. Mester categorisa abuso di mucha mester como atentado di morto cu a laga e victima trauma pa bida. Unda e ley contra abuso di mucha a keda?

Mas cu 40 miyon florin extra di presupuesto a bay pa soluciona e crisis social na Aruba. Pero te dia di awe gobierno no por mustra unda e placa bay y kico su efectividad tabata. E medio di comunicacion, 24ora.com, a laga sa cu nan no ta publica caso nan di problema social of suicidio. E berdad ta cu esey no ta nan tarea. Ta tarea di Minister di Asunto Social y Departamento di Asunto Social pa sali y duna cuenta y rason. Comparti dato cu comunidad y yuda educa comunidad. Specifica e problema social pa asina pueblo por comprende kico ta pasando.
Por ehempel:
– Cuanto suicidio of intento di suicidio tin pa luna?
– Cuanto mucha y adulto ta sufri di depresion?  

Mi ta kere ta tempo p’e parlamentarionan, e representantenan di pueblo bini hunto y exigi di gobierno accion y transparencia den e tema di abuso di mucha.
Parlamento di Aruba tin 5 parlamentario cu ta bin di e area social. A bira tempo nan bini hunto y representa pueblo di berdad. Pueblo kier siguridad y proteccion pa su yiu an. Pueblo kier castigo mas severo pa e criminalnan di mucha. Pueblo kier atencion pa e crisis aki.

Un criatura inocente ta perde bista riba bida pasobra un monster, un sinberguensa ta abusa di dje. E famia tambe ta sufri.  Na mi opinion abuso di mucha ta e crimen mas cruel cu un hende por comete contra un otro persona. 

Un pregunta ta keda, ki dia nos ta bay den “lock down” y tuma medida mas evero pa evita cu pandemia di abuso di mucha ta sigui plama?