CIBC FIRSTCARIBBEAN A PONE ATENSHON SPESHAL NA SALÚ DI E STAF DI BANKO RIBA DIA DI SALUBRIDAT I BIENESTAR 2022
Willemstad 1 di Novèmber 2022- Resientemente CIBC FirstCaribbean tabatin un dia di salubridat i bienestar 2022. E banko a tuma tempu pa suprayá i promové e importansha di biba salú i traha riba e kondishon serka su empleadonan kende ta e rekurso mas importante di e banko.
E banko ta aspirá pa su empleadonan biba un bida salú i felis. Varios aspekto di un bida salú i den kondishon a keda atendé na diferente forma durante di e dia.
E dia di Salubridat i Bienestar di CIBC FirstCaribbean a bira un dia yená ku evento pa empleadonan, kaminda nan a keda enkurashá pa bisti kolónan ku ta reflehá salú manera kòrá, hel, oraño, blanku, blou, lila i bèrdè.
E dia a kuminsá ku un chekeo di salú dor di LabdeMed na e ofisina prinsipal. Aki e bùs di LabdeMed tabata stashoná pa hasi chekeo di kolestoròl. Kada empleado a risibí un ‘Personal Health Tracker’ pa yuda nan mantené hábitonan salú i ku ta fomentá nan bienestar dor di tuma nota di nan kolestoròl, preshon di sanger, suku, peso i índise di vet (BMI) riba un base regular.
Dirèkt despues di e chekeo e koleganan por a saboreá un desayuno saludabel, kual a konsistí di ‘smoothie’ òf ‘yogurt’, pa start e dia. Despues LabdeMed a ofresé un charla tokante kon hiba un bida salú dor di bon nutrishon i ehersisio. Un kuminda salú, ku tambe a baha hopi bon, a keda ofresé durante di almuerso.
E personal di CIBC FirstCaribbean a keda introdusí na algun rutina di eherisio físiko ku ta konsentrá primordialmente riba loke por hasi den ofisina pa refreská i restorá e kurpa durante di dia.
