Chens di awasero por ta pisa

Ya caba for di trempan diahuebs mainta, tabatin awasero basta pisa cu a cay riba nos isla, anticipando cu awa lo sigui cay den e proximo dianan, mirando cu tin un mal tempo ta acercando e islanan ABC (Aruba, Boneiro y Corsou). A base di esaki, Departamento Meteorologico Aruba, a emiti un alerta (di tres), valido di diahuebs 6 di october (ayera) te cu diasabra, dia 8 di october 12:00 pm.

Den e sinopsis Meteo ta indica cu ainda por spera awasero di varios intensidad durante e periodo aki te kisas diasabra 8 di october riba Aruba y cercania ora un ola tropical activo, cu awo ta ‘Potential Tropical Cyclone nr. 13’ crusa den nos region bayendo west.

Desaroyo of no di e sistema aki, e lo trece un chens halto pa awasero modera te pisa localmente cu por trece cantidadnan di 25 te 45 mm durante e periodo describi ey.

Por spera biento di 50 te 60 km/ora den rafaga, durante awasero modera te pisa cu lamper y strena. Awasero modera te pisa por causa molester na cierto parti.

CONDICION MARITIMO

Lama por bira bastante bruto te bruto principalmente n’e partinan di costa oost te noordwest y lama temporalmente agita na parti zuid y e partinan protegi. Un aviso pa boto chikito ta na vigor pa specialmente e partinan oost te noordwest di costa y tambe pa lama habri. Na operadornan di boto chikito ta bay un advertencia pa no aventura cerca di e areanan cu awasero of lamper cu strena.

Resumen:

• Spera 25 te 45 mm di awasero

• Un aviso pa boto chikito ta na vigor, specialmente p’e partinan di costa oost te noordwest y lama habri.

• Ta suplica e operadornan di boto chikito pa evita e areanan di awasero y lamper cu strena.

UN TORMENTA CU POR FORTALECE

E “potencial” tormenta tropical diestres diahuebs a forma den e parti zuidoost di Caribe, dilanti di e costanan di Venezuela. E lo por fortalece durante fin di siman te cu e bira horcan dilanti di e costanan di Nicaragua. Asina e Centro Nacional di Horcan (NHC) di Merca a bisa.

Pa 3:00 pm di diahuebs, e centro di e perturbacion ciclonico tabata localisa na 240km (150 miya) west di Corsou y na 500 km (310 miya) west-zuidwest di e punta nort di e peninsula Colombiano di La Guajira.

Te cu diahuebs atardi su bientonan sosteni maximo tabata di 55 km/h y e sistema tabata move west na un velocidad di cera di 24 km/15m/h.

Ta spera awasero fuerte riba e islanan ABC (Aruba, Bonaire y Corsou), como tambe den e parti nort di Sur America, e observatorio a señala.

Diahuebs e sistema a sigui produci awasero y tormenta electrico riba e islanan ariba, den nort di Sur America y e awanan cercano.

E interaccion cu tera di costa nort di Sur America por obstaculisa e desaroyo significativo den e proximo 24 oranan, pero e condicionnan ambiental ta ideal pa e sistema intensifica den 48 ora, c’un 90% di probabilidad di hacie.

Ta spera cu e sistema lo fortalece mas segun e bay ta avansa pa e parti west riba e parti zuidwest di Lama Caribe te cu Centro- America entrante diabierna.

COLOMBIA A EMITI AVISO

Gobierno di Colombia a emiti un aviso di tormenta tropical pa e costa oost di e pais desde e frontera entre Colombia y Venezuela pa e parti west te na e ciudad di Riohacha.

Tin tambe alerta di “interes” na San Andres, Providencia y e costanan di Nicaragua y Honduras, cu mester monitor e progreso di e depresion, segun NHC.

Den e trayecto pronostica, ta spera cu e sistema move cerca di e islanan ABC, e costa noordoost di Venezuela y e Peninsula di Guajira, Colombia te cu diabierna mainta.

Despues e pronostico ta cu e lo move a traves di zuidoost di Lama Caribe y diadomingo e lo yega cerca di e costa di Nicaragua posiblemente ya caba como horcan.

NHC a informa tambe cu e depresion tropical Doce, situa memey di Atlantico, pronto lo bira un residuo di presion

KICO TA HURRICANE WATCH

Un ‘Hurricane watch’ of un alerta di horcan ta nifica cu e condicionnan di horcan ta posibel dentro di e area di vigilancia (watch). Un ‘watch’ ta emiti normalmente 48 ora prome cu e prome aparicion premira di biento cu forsa di tormenta tropical, condicion cu ta haci cu e preparacionnan den exterior ta dificil of peligroso.

KICO TA TROPICAL STORM WARNING

Un ‘Tropical Storm Warning’ of aviso di tormenta tropical ta nifica cu ta spera condicion di tormenta tropical na un luga di e zona di advertencia of warning, den e caso aki, dentro di e proximo 12 pa 24 ora.

E interesnan a lo largo di e costanan di Nicaragua y Honduras mester vigila e progreso di e disturbio. Por ta necesario aviso of advertencia adicional riba diabierna.