Chauffeur di Kia Rio a bay flauw despues di baha caminda y dal contra palo di luz

E origen exacto no ta conoci ainda, e echo ta si cu diadomingo anocho alrededor di 11:00 pm a sosode un accidente riba e caminda di Palm Beach pa Westpunt, un poco mas pariba di Marriott. Aki ta caminda cu chauffeur di un Kia Rio color bruin numera A-4352 a baha caminda y dal contra di un palo di luz. Despues di e impacto, e chauffeur a bay flauw.

Tanto e pasahero como e chauffeur ta hende muhe di riba cincuenta aña. Ambos tabata keha di dolor na pecho. E front di e Kia e keda completamente destrui. Polis di trafico a presenta na sitio pa documenta e accidente aki mientras ambulance a atende cu esunnan herida. Na final a transporta nan pa hospital pa ricibi atencion medico mucho mas avansa. Un total di dos di ambulance a presenta na sitio. Na sitio a compronde for di un colega di e chauffeur cu; nan a cab’i traha un rato prome y cu e victima a sali for di trabou prome cu ne.