Campaña ‘Stuff the Stocking’ di Wind Creek Aruba: Mas di 400 mucha a haya regalo

E famia grandi di Wind Creek Aruba a bini hunto pa regala nos muchanan un pasco felis. E campaña ‘Stuff the Stocking’ a resulta un exito total colectando mas di 400 cos di hunga pa nos muchanan cu a reparti rond Aruba.  

Un Pasco felis pa nos muchanan tabata e meta principal di Wind Creek Aruba como nan compromiso na e comunidad di Aruba, regalando tur mucha un regalo bao kerstboom y asina alegra nan Pasco. E campaña di ‘Stuff the Stocking’ a colecta mas di 400 co’i hunga bao di e hungadonan di Wind Creek Crystal Casino y Wind Creek Seaport Casino. Tur cliente di e casino por a entrega un regalo balora na $10, a cambio ta ricibi $10 den FREE Play como gradicimento pa nan donacion. 

Un bus completo yena cu regalo, Santa Claus y su ‘elves’ nan di Wind Creek Aruba  bao guia di Gianaika Van Der Biezen cu ayudo di Stichting Fundashon Pa Nos Comunidad a haci entrega di un total di 427 articulo di hunga y educativo na muchanan di edad entre 3 te cu 15 anja di menos recurso. Por a admira e felicidad riba cara di kada mucha. 

Wind Creek Aruba kier a yama danki na cada un cliente di Wind Creek Casinos como tambe e miembronan di ekipo pa nan donacion pa asina mira un sonrisa riba cara di tur e muchanan e Pasco aki. Hunto nos por logra hopi y haci un cambio den nos comunidad. Wind Creek Aruba ta desea henter e pueblo di Aruba un Feliz Aña Nobo!