CAFT: E problemanan di Aruba ainda ta hopi grandi

Tras e decision diabierna mainta di parti di Conseho di Minister di Reino pa no duna Gobierno di Aruba un instruccion (aanwijzing), a busca e reaccion di parti di CAFT cu ta e entidad cu a propone esaki na Gobierno Hulandes. Un delegacion di CAFT tabata na Aruba dianan 20 y 21 di october pa sostene reunion cu gobierno y otro stakeholder. A sinta cu miembro di CAFT, Hans Hoogervorst na oficina di e entidad, ubica riba L.G. Smith Boulevard.

A cuminsa na pidi CAFT su reaccion riba e decision di Conseho di Minister di Reino, pa cual Hoogervorst a indica cu nan a duna conseho pa otorga un instruccion na maart di e aña’ki, pero desde e tempo ey, e economia di Aruba a reestablece fuertemente danki na un miho ingreso di contribucion fiscal y e reduccion di e deficit financiero. Nan ta wak esey como e motibo pa cual Secretario di Estado, Alexandra van Huffelen pa bisa cu, pa awo, e no ta wak e instruccion necesario.

Sinembargo, e alto funcionario Hulandes a indica cu pareu por mira hopi cla den e comunicado di prensa for di Den Haag cu e problemanan di Aruba ainda ta hopi grandi y cu su debe nacional ta rond di 90% di su economia. Un di cinco parti di Aruba su presupuesto ta bay na paga solamente interes riba debe. E ta considera esey un suma cu no ta bay na cosnan mas probechoso y p’esey e mandato ta hopi cla: “Nos kier pa Aruba alcansa den su presupuesto 1% di surplus pa asina reduci e debe nacional y esey ta keda hopi importante.”

Hoogervorst: “Mi ta kere cu nos conseho a pone enfasis cu mester tum’e na serio y a tene cuenta cu ne den e realisacion di e maneho presupuestario no solamente aki na Aruba, pero tambe na Corsou y nos ta continua cu nos maneho. E echo cu no tin un instruccion aworaki no ta nifica cu algo a cambia pa Aruba, pasobra e problema ainda ta grandi y mester traha duro riba nan.”