Bureau Rampenbestrijding Aruba (BRA): No ta necesario declara estado di emergencia

Diaranson anochi, Bureau Rampenbestrijding Aruba (BRA), Servicio Meterologico y Departamento di Obranan Publico (DOW) a yama un conferencia di prensa pa asina duna di conoce kico ta spera cu e pasada di e ola tropical cu ta denomina Invest 91L. Basa riba e boletin di 5’or di atardi, e tres servicionan aki a tuma nan determinacion y por duna un imagen mas cla di kico ta na caminda.

Den conclusion: No ta necesario declara un estado di emergencia, por spera awa cay entre diahuebs y diasabra marduga. E saturacion di tera despues di pasada di Bonnie y tambe siman pasa, ta pone cu lo tuma mas tempo pa e awa haya su caminda pa lama.

Rino Hermans di BRA a splica cu bou condicion normal, Aruba tin cu capacidad di wanta yobida di te cu 80 mm di awa. Bonnie a trece un total di 38 mm di awa y danki na informacio di Meteo, ta calcula cu e ola tropical Invest 91L por deposita rond di 45 mm di yobida.

“Teniendo na cuenta cu tera ta satura caba door di e yobida di e ultimo dianan, ta premira cu lo tin strobamento den fluho di trafico,” asina Herman a declara. Su tras a bisa cu BRA no ta bisando pa cera ningun negoshi, sinembargo ta pidi doñonan di trabou pa tene cuenta cu diahuebs mainta por tin caba dificultad den trafico.

David Barkmeyer, hefe di Servicio Meteorologico a duna un splicacion di e trayecto cu e ola tropical a tuma desde su formacion na e parti entre continente Africano y Suramericano. “Inicialmente tabata mucho mas impresionante,” Barkmeyer a indica, pero “a perde hopi convexion probablemente door di e interaccion cu islanan den zuidoost di Caribe y e cercania cu tera di Venezuela.” Asina hopi cu e ola tropical a parti den dos; un pida a bay noordwest y lo pasa noordoost di Boneiro y eventualmente di nos; e otro a keda stanca banda di Trinidad.

Conferencia di prensa extraordinario relaciona cu situacion di tempo

Conferencia di prensa extraordinario relaciona cu situacion di tempo

Posted by 24ora on Wednesday, October 5, 2022

Sinembargo, Barkmeyer a adverti cu “ta sistemanan ferfelo cu por causa basta awacero den transcurso di proximo 24 pa 48 ora.” Pa cu esaki Meteo a saca un alerta pa mal tempo cu ta valido for di awetardi te diasabra merdia. E hefe di Meteo a bisa cu e mal tempo por caba prome, pero mas siguridad ta hacie te e ora ey.

E yobida den e islanan ABC ta cuminsa diahuebs marduga, mientras cu e parti di diahuebs mainta lo ta e parti mas pisa. Riba pregunta si condicionnan por empeora repentinamente, Barkmeyer a duna di conoce cu den situacion di tempo tur cos ta posibel, pero e chens ta chikito, atrobe, door di e cercania cu e parti noord di e continente suramericano.

Di su banda, Ing. Marlon Croes, director di Departamento di Obranan Publico tambe a hiba palabra indicando kico ta e preparativo cu a haci pa maneha e acumulacion di awa rond Aruba. E departamento aki tambe tabata encarga di midi e nivel di saturacion den tera. Adicional na e caida door di Bonnie, e yobidanan di siman pasa a percura pa un 37 mm di awa adicional den nos suelo.

Diaranson atardi personal di DOW a pasa controla puntonan problemtico y Cros a indica cu a tuma precaucion caminda tabata necesario. Esey a sosode siman pasa tambe na, por ehempel, cas cu ta menasa di yena cu awa. Pa e dianan nos dilanti, e hefe a sigura cu ekipo di DOW ta prepara pa atende e situacion cu presenta. Ya caba ta preparando un ekipo cu su trabou lo ta pa baha cantidad di awa y percura cu e ta yega lama.

Un manera cu pueblo mes por coopera pa tin menos situacion fastioso ta door di habri e pasadanan di awa cu por tin entre un tereno y otro. “Si a cera pasada di awa, ta pidi pa habri nan bek pa e fluho di awa tuma luga sin problema,” asina Croes a declara. Adicionalmente, por mira riba e pagina di Facebook di DOW cua ta e number telefon pa meld situacion cu mester di DOW su asistencia. Como nota adicional, DOW a indica cu rotonde di Palm Beach a keda cla awe y si tur cos ta bon, e awa ta bay core bon awor si.