Bulando nan cura: Abogado kier regula periodismo

Diabierna Orden di Abogado (Orden van Advocaten/OvA) na Aruba a emiti un comunicado unda nan ta elabora riba e publicacion di potret di hende riba e websitenan di noticia. 

Den e ultimo añanan a bira custumber cu e websitenan ta publica potret di tur hende, sin tene na cuenta cu e victima, e sospechoso, e famia tambe tin derecho di privacidad. E orden ta indica cu nan a acumula regla pa tur nan miembronan cu ta abogado, pa den caso cu e abogadonan kier cuminsa defende derecho di nan clientenan, cu nan por haci esaki cu un resultado exitoso, contra di e websitenan di noticia.

Exageracion, saca potret di hende scondi, sin tin permiso, publica potret di victima di accidente di cerca, tur esaki awo e persona cu sinti su mes afecta, por cuminsa un caso contra dicho website pa pidi daño.

E Orden di Abogado di Aruba (OvA) a observa cu a pasa di periodismo tradicional, unda e noticia ta yega na publico principalmente di forma imprimi, pa e periodismo digital moderno cu imagen grafico “live”.

Noticia, e nomber ta bisa tur cos, solamente ta noticia ora ta implica un echo nobo. Por lo tanto, un periodista kier ta e prome pa duna noticia y publica online lo mas pronto posibel. Sinembargo e Orden di Abogado ta kere cu ta importante pa señala cu e primicia, no mester bay a costo di tur cos, sin pone e interes general den balansa. 

Regularmente tin dos interes diferente den e informacion. Di un banda e interes di prensa, esta e libertad di prensa cual ta tambe e libertad di expresion, manera e articulo I.12 di nos Constitucion di Aruba y den e articulo 10 di e Convenio Europeo pa Proteccion di Derecho Humano y e Libertadnan Fundamental (“CEDH”).

Di otro banda, tin e interes di e persona obheto di e denuncia, pa e respet di su derecho pa respeta su bida priva, familiar y di su famia, tal y manera ta poni, entre otro, den e articulo I.16 di Reglamento di Estado di Aruba y den e articulo 8 di CEDH. 

Pensa, por ehempel, riba e personanan sospechoso di un crimen of delito, riba e autor y/o victima di un accidente y riba famianan den caso di fayecimento.

E punto di salida ta cu ambos derecho tin e mesun peso, y mester respeta tur dos. Pero, si tin un friccion entre e dos derecho fundamental aki, mester haci un evaluacion di interes.

Hurisprudencia ta tene cuenta c’un serie di criteria na momento di realisa un balans di interes.

Na prome luga, mester considera na ki midi un potret of publicacion ta contribui na e debate publico riba un tema di interes general. Na di dos luga ta importante e papel of funcion di e persona implica y e naturalesa di actividad riba cual e informacion ta basa. Por ehempel, ta menos probabel c’un persona publico lo reclama e proteccion pleno di su bida priva, cu un persona no publico.

Pero incluso cu respet pa un persona publico, esaki tambe tin su limite, ora e material di imagen, y texto publica, ta referi exclusivamente na bida priva di e persona en cuestion y tin e unico proposito di satisface e curiosidad publico.

Na di tres luga, e conducta previo di e persona en cuestion ta importante, por ehempel si el a busca publicidad su mes, esey por ta un factor pa tene na cuenta.

Na di cuater luga, mester tene cuenta cu e metodo di publicacion y e alcance di e difusion di e material di imagen y texto. Den rednan social, por ehempel, e alcance di e difusion via e posibilidad di “share”, ta grandi, loke ta rekeri mas cautela ainda.

Por ultimo, ta importante sa, si e material visual cu a graba, tabata “open” of scondi.

Asina hues lo aplica un prueba di necesidad y proporcionalidad y ta check si e reportero tabatin otro medio na su disposicion, cu mustra e persona en cuestion, completamente reconocibel den e imagen, di tal manera cu e no perhudica e publicacion y den menor forma, haci vulnerabel e derecho di proteccion di bida priva.

Mas frecuentemente cu loke ta pensa, e publicacion di imagen sin edita, (“live”) no ta necesario pa expresa e reportahe. Si no existi un necesidad, ta considera dicho publicacion desproporcional y pa cu su obhetivo pa informa publico.

Den caso di un accidente, por ehempel, ta basta cu describi e accidente, e daño na e autonan y otro dañonan cu por tin, sin acerca e victima, pa asina proteha su intimidad. 

Si e metodo di publicacion no ta cumpli cu e prueba necesario y proporcionalidad, y como resultado bin un invasion no hustifica privacidad di un persona envolvi den e informacion, e ora ey e publicacion ta ilegal y e persona por pidi derecho di compensacion (inmaterial).

E Orden di Abogado a traha riba algun norma di conducta pa e abogadonan, pasobra kier propaganda e etica cerca e abogadonan, cu na dado momento lo kier uza nan den caso futuro.

Pa e rasonnan similar, e Asociacion di Periodista di Hulanda a adopta e Codigo di Periodismo.

Reglanan di Asociacion di Periodista di Hulanda ta bisa den puntonan:

18. E periodista no lo invadi e intimidad di e persona, mas cu ta necesario den contexto di un raportahe abierto.

19. E periodista ta respeta e intimidad di e victima, di famia y pashent, pero tambe di sospechoso y di e autor, evitando cu lo reconoce e personanan aki di un manera disporpocional. 

20. E periodista no ta publica texto of potret ni tampoco difundi audio of imagen di un persona den situacion priva sin e autorisacion di e personanan afecta, al menos cu e publicacion tin un interes social importante.