Buki Maraca ta un realidad

Diamars na Biblioteca Nacional a tuma luga presentacion di e buki Maraca cu ta un coleccion di storia- y poesianan cortico.

E idea a bin door di un curso di ‘Creative Writing’ duna na 2021. Vivienno ‘Vi’ Frank Jr., cu ta e persona cu a duna e curso, a pidi e cursistanan pa nan publica nan obranan. E curso tabata di skirbimento di buki den tur aspecto. Varios di e participantenan a yega di publica caba, pero algun otro no. El a tuma e encargo di produci e buki y despues di seis luna, cu a colecciona e storianan, repasa nan, a duna forma na e buki ‘Maraca’. Tur participante tabata liber pa scoge nan idioma.

E buki ta primordialmente na Papiamento, pero tambe tin algun cu ta na Ingles, un poco di Hulandes, otro Spaño, pero 98% ta na Papiamento.

E buki aki tabata conta cu ocho autor, cualnan ta Noris van Lis – Donata, Ariana Koolman – Chirino, Glenda Tromp – Geerman, Dominico Werleman, Vivienno Franken Jr, Elliënne Riatiga, Ida Croes y Adelaida Ponson – Arends.

Tabata tin mas participante, pero algun di nan pa un otro motibo no a logra, pero Frank ta contento di toch algun di e autornan cu nunca a skirbi, asina mes a tuma e durf  y cu awe nan obra literario awe ta den e buki.

E storianan ta sumamente varia y dia cu a tene un contest pa nomber di e buki, tur e autornan a entrega algo pa un nomber y Noris van Lis-Donata a bin cu e nomber ‘Maraca’, ya cu tabata tin ocho persona diferente, cada un cu nan mesun estilo, nan mesun storia.

Frank a bisa cu e storianan ta varia for di anecdotanan personal, fantasia, thriller y mucho mas. Por ultimo, el a bisa cu pronto e buki ‘Maraca’ lo ta obtenibel na tur e librerianan riba nos isla.