Brownbill ta sumamente kontentu ku e trabounan hasi pa e reapertura di e terminal na Bullenbaai
Willemstad- Bastante trahadó a pèrdè trabou despues ku e kòntrakt entre Refineria di Kòrsou(RDK) i PDVSA a terminá, kousando un desbalanse den nos ekonomia, komo ku refineria tabata e fuente di entrada di hopi kabes di famia. Hopi ta e profeshonalnan ku konosementu ku mester a realoká nan mes pa un di e paisnan den reino pa por a sigui generá pa nan famianan. Pero Gabinte Pisas II a priminti ku e gobernashon aki lo ta di pueblo i huntu ku e pueblo i Parlamentario pa e Frakshon di MFK Fergino Brownbill por mira berdat ku ta pueblo su bùrt.
28 di sèptèmber último e Barko petrolero COLON a yega e terminal na Bulenbaai ku un kantidat 600.000 bari di “fuel oil”. Esaki ta nifiká empleo direkto pa 20 èks trahadò di RDK. Banda di e 20 trahadonan ku a risibí trabou bèk Parlamentario Fergino Brownbill ta sumamente kontentu ku e vishon a korto plaso ta pa mas o ménos 100 persona mas risibí trabou na e terminal aki.
Awor importante ta pa nos profeshonalnan i alabes sanger nobo por risibí oportunidat pa por kuminsa produsí pa nos komunidat. Bastante tabata esnan ku na yüni último a registrá durante di e kampaña pa a inventarisá e kantidat di personalnan ku e konosementu pa traha riba refineria i e terminal na Bullenbaai. Un grupo grandi di esnan ku a registrá durante di e kampaña aki tabata e grupo entre 18 pa 29 aña di edat. E pregunta ta, kon lo por segurá ku e hóbennan tambe ta haña e oportunidat pa empleo i desaroyo riba e tereno aki. E kontesta ta e “Lei di Bion den bachi nobo”.
Promé Minister ya ta kumpliendo ku e promesa pa laga nos refineria kuminsa drai bèk. Importante ta komo legisladó pa sòru, pa huntu ku sektor privá, baha e porsentahe di desempleo hubenil. E lei di bion den bachi nobo lo duna e insentivo nesesario(teniendo kuente ku e relidatnan aktual) pa e doñonan di trabou duna oportunidat real pa e hóbennan tambe kuminsa aportá na nos ekonomia. Frakshon di MFK ta hasiendo tur e esfuersonan pa hasi algun adaptashon na e inisiativa di lei aki, pa e aña aki mes manda esaki den direkshon di e Organo di konseho “RvA”.
Esaki ta e sistema ku nos tin ku funshoná kaminda ku gobièrnu ta hasi su esfuesonan pa krea trabou i Parlamento komo legisladó mester sòru pa bini ku lei ku ta sòru ku e komunidat por benifisiá for di dje.
Fergino Brownbill
Miembro di Parlamento
Pa Frakshon di MFK
