Booster ku Bakuna Bivalente COVID-19 (1)
Willemstad – Ministerio di Salú, Medio Ambiente i Naturalesa (GMN) ta anunsiá introdukshon di e bakuna bivalente di COVID-19 komo booster na Kòrsou.
Entrante djaluna 17 di òktober 2022 lo kuminsá booster ku e bakuna bivalente di Pfizer na Servisio di Salú Públiko di Kòrsou, “Uitvoeringsorganisatie Geneeskunde & Gezondheidszaken” (UO G&Gz, ántes GGD) na e departamento di “Infectieziektebestrijding” (IZB) ku ta situá na Piscaderweg 49, Zakito. E booster ta sosodé a base di un skema di edat (aña di nasementu) ku lo keda publiká regularmente.
Skema pa booster na UO G&Gz (ántes GGD)
Fecha: 17, 18, 20 i 21 òktober 2022
Orario: 08:00 pa 12:00 i di 13:30 pa 17:00
Grupo di edat: Personanan nasé na aña 1945 òf promé (“walk-in”)
Pa kualke informashon por yama 661 0095 durante orario di trabou.
Bakuna Bivalente di Pfizer pa booster
E Agensia Europeo di Remedi (European Medicine Agency, EMA) a aprobá na sèptèmber último e uso di e bakuna bivalente pa por sigui kombatí e malesa di COVID-19. E bakuna ta wòrdu yamá bivalente komo ku e trahá pa kombatí e variante ‘Wuhan’ i e variante ‘Omicron’ di e SARS-CoV-2 vírùs i ta wòrdu usá komo booster pa personanan kuminsando for di 12 aña.
Informashon adishonal
- Periodo di tempu entre e último bakuna di COVID-19 i e booster bivalente ta mínimo 3 luna.
- Periodo di tempu entre un tèst positivo pa COVID-19 i e booster bivalente ta mínimo 3 luna.
- No tin ku tene kuenta ku un periodo di tempu entre e ‘griepprik’ i e booster bivalente.
Pa mas informashon di Salubridat, Medio Ambiente i Naturalesa “like” nos Facebook page “Ministry of Health Curacao”.
