Booshi Wever (UPP): Ministerio Publico no ta actua

Ya ta 46 luna cu mi persona a haci entrega di un denuncia amplio y cu prueba contra Otmar Oduber den e compra di e incinerator chikito. Un incinerator cu NO ta traha y no ta cumpli den ningun forma cu e bestek.  Ta conoci cu den henter e compra aki, Otmar Oduber a peca grandemente contra nos Ley di contabilidad. Nos Parlamento y su Parlamentarionan cu a bin y bay, desde 2018 a keda boca “callao” y mas pio ainda a y ta sostene y aproba e corupcion aki!

Ta parce cu e gobierno actual a pega cu e malesa di gobernacion berde na unda e Ley di Contabilidad tabata t’ey pa “spek en bonen”. Ora cu a bin un cambio di gobernacion na 2017, pueblo a kere cu porfin gobierno lo hiba un maneho basa riba integridad y cumplimento di nos leynan. Al contrario, e gobierno a scoge un modus operandi cu a sobrepasa e maneho devastador di e partido berde. Asina nos por menciona cu a otorga un contract miyonario pa e trabounan na Sero Teishi SIN ningun tipo di destaho,  corda pa ta te hasta destaho publico (2018). Un biaha mas Parlamento a keda keto y pa colmo a sostene e maneho contra nos leynan vigente.

Recientemente un biaha mas a otorga un contract miyonario na dos compania local pa loke ta trata e maneho di tire (2022)! Atrobe SIN destaho publico. Un biaha mas nos Parlamento den su totalidad a keda “calladito”. Den su conseho recien CAFT un biaha mas a baha pisa riba e falta di seriedad den maneho di nos pais. Un maneho na unda no ta respeta e palabracionnan haci y ta recuri na mentira of mitar berdad. Pa ta mas specifico CAft a indica cu NO tin ningun plan concreto pa loke ta trata Serlimar, pero Minister Arends “doodleuk” ta sigui bisa cu na december venidero lo cera e dump na Parkietenbos.

Loke minister si ta hopi bon den dje ta bin cu lema yamativo pa yena wowo di hende manera e famoso “TRASH2CASH”, mientras CAft ta subraya cu ta puro “fata morgana”, pasobra NO ta tin nada concreto. Of esaki tambe ta un “SP(R)OOKJESVERHAAL”!? E unico aspecto di “TRASH2CASH” ta pa e compania envolvi, pero unda e pueblo ta hay’e cu “CASH4TRASH”, pagando pa su desperdicio, pa otro por cashout money.

Banda di e echo cu probablemente atrobe no ta bay cumpli cu e Ley di Contabilidad (y parlamento keto bay tacallao) pa e.o. paga e candela (3.5 miyon por lo menos), ta surgi e pregunta si tin placa pa esaki den e presupuesto. Otro pregunta ta di lo sigui cu e maneho ad-hoc di e gobierno anterior y lo bay haci cos den pura y otorga contract SIN destaho publico? Kico Parlamento lo bay haci? Keda keto atrobe? E ley di contabilidad ta e base pa cualkier maneho INTEGRO. Pone esaki un banda simplemente NO ta INTEGRO! Parlamento lo acepta esaki? Si un minister mara gobierno sin presupuesto of contra ley, esaki ta un acto CRIMINAL conforme nos leynan penal. Y e forma di goberna aki ta pone cu mas y mas gobierno di Hulanda ta haya rason y motibo pa mete cu nos autonomia, cu ya caba pa gran parti ta entrega, cada bes cu prome minister pone su firma cu gobierno Hulandes pone su dilanti.

Ta p’esey ta hopi condenabel cu nos Ministerio Publico no ta actua contra violacion di nos ley di contabilidad manera ta hinca den mi denuncia di 2 di december 2018. Si Ministerio Publico a actua contra Otmar Oduber, probablemente e minister Arends lo a coy curpa y no a comete e acto manera poni den nos ley di contabilidad. P’esey proximamente mi lo bolbe (pa di 6 biaha) acudi na OM pa nan actua sino mi lo bay Hof pa pone nan stop cu e maneho selectivo cu tin awo. Y asina para e racha di inhusticia di nos ley di contabilidad!

Cada bes atrobe mi ta bisa, cu pakico preocupa. Mi ta pone mi dilanti di kier stop di laga gobernacion bay e direccion cu e ta bay. Pero como un bon Arubiano, cada bes e actonan di gobierno y di nos Parlamento ta pone toch reaccion riba e fechorianan cu ta tumando luga.