Boneiro ta gradici Deaxo pa su curashi y causa noble

Mark Benson Denz di 24ora.com a sostene un entrevista cu Miles Mercera, CEO di Tourism Corporation Bonaire (TCB) den cual e entidad a expresa formalmente su gradicimento na Deaxo Croes, su ekipo y tur Arubiano cu Semper ta sostene Boneiro. E ta considera cu Deaxo ta un persona noble y cu curashi pa tuma e reto di landa for di Boneiro pa Corsou pa recauda fondo pa, entre otro, Kankerfonds Bonaire.

Algun luna pasa, tempo cu Sportology Foundation a tuma contacto cu TCB pa splica nan di e proyecto, nan a reacciona di biaha positivamente. “E ta algo unico cu, no solamente ta pone Boneiro riba mapa caminda por landa di un isla pa otro, pero tambe sigur e motibo tras di dje, esta recauda fondo pa Kankerfonds. Personamlente y como isla nos ta aprecia y ta mira cu e contribucion tin su derecho di existencia,” asina Mercera a expresa.

TCB ta contento di por a aporta un granito chikito den e parti logistico ora e ekipo ta riba e isla, cu preparacion y diferente aspecto, pero di otro banda, e delegacion a reconoce talento local y contribui na nos mesun hendenan door di  crea un perspectiva diferente, haci cosnan diferente. Diahuebs Deaxo Croes a landa hunto cu miembronan di Aquatics Federation Bonaire den un landa pa Klein Bonaire.

Y hustamente algo asina ta loke Mercera a señala, caminda ta conoce na Boneiro e famoso Swim to Klein Bonaire, pero no tabata conoce e Swim to Curacao. E CEO di TCB ta pensa riba e posibilidad den  futuro pa crea un atraccion turístico caminda ta reta esunnan rond mundo cu ta tribi, di tuma e stap grandi aki y pa un bon causa.

Pa e relato completo, lesa edicion di TREMPAN