Bon ehempel ta bini di cas riba caya no tin nada

Ta deber di tur mayor pa guia nan yiu riba bon caminda, si un mucha no ta haya bon ehempel for di cas, e no por ofrece nada ora e sali, pasobra ningun hende no por duna locual cu nan no tin.

Tur caminda cu hende ta stima nan ta duna, p’esey mayornan mester duna nan miho tempo na nan yiunan, pa asina e pais por cosecha cuidadano integro, serio y di bon caracter.

Ta notabel den un actitud di un hoben,for di cual cas e ta bin, kico e a ricibi di su mayornan, pasobra nos tur como mayor mester cuminsa pone mas tempo pa nos yiunan, pasobra e tempo den cual nos ta bibando ta trabahoso (  2 Timoteo 3 :1-9).

Nos contacto personal cu nos yiunan, nos oracion, nos momento di sinta come hunto na mesa, tur esakinan ta importante pa nos hinca bon conseho, coreccion, y displina den nos yuinan.

Nos no ta yama pa pone nos yuinan rabia, pero nos deber ta pa sembra respet den nan, pa asina nan tambe tin respet pa duna na tur hende cu nan conoce.

Si un mucha no tin respet, bo no por culpa su maestro/maestra di scol, pero bo tin di bay bek cerca su mayornan, pasobra ta di eynan su formacion ta bini.

Aunke e tempo a bira moderno, y tur cos ta digital, te ainda respet pa hende no a bira digital, y hopi biaha porta ta cera pa nos hubentud, pa motibo di falta di respet.

Den un cas caminda  tin faltamento di respet tur momento, e ta bira un custumber, y sin bo pensa actitud di bo yiunan ta cambia, pasobra nan ta sigui e ehempel cu abo cu ta mayor ta duna.

Ora cu un hoben no tin respet pa su mes, hende cu no tin  respet of miho bisa e malbadonan lo acerca, pasobra nan ta mira cu ta facil pa yega cerca dje.

E bida di e hoben no ta facil, pero mas enfasis e mayornan pone riba e palabra di Dios pa su bida,respet y estudio, mas bendiciona e hoben su bida lo ta.

Tin asina tanto trampa y distraccion den bida di un hoben cu e mayornan mes no por imagina con grandi nan ayudo pa bida di nan propio yiu mester ta. 

Cada hoben cu ta salba y bibando pa Cristo ta un trofeo pa nan mayornan, cada hoben cu ta cana den caminda di respet , hibando un bida decente ta un bendicion pa henter comunidad.

Tin hopi hoben cu no a caba di crece ainda cu ya nan bida ta den decadencia, pasobra scuridad ta domina nan bida, y en bes di nan wak riba hende drechi, pa nan cana drechi nan ta wak riba hende  robes cu ta biba un bida di mentira y inmoralidad y nan ta desea pa imita.

No ta keda mayornan nada mas pa uni den oracion sclama na Dios, pasobra nos tur sa cu e ladron a bini  pa solamente horta, mata y destrui, pero nos como mayor tin e autoridad den nos boca pa reprende for di bida di nos yiunan.

Nos no por gamble cu bida di nos yiunan, nos no por laga pa mayan, locual nos tin di haci awe, pasobra ora un palo crece dobla e ta bira dificil pa bo stret e bek.

Laga nos como mayor sirbi Dios seriamente y asina por ta un bon testimonio pa nos yuinan.

Sinceramente , Pastor Marcel Balootje.