Biento fresco suplando: Polisnan contento cu detaye

“Ni tempo di Dolfi, ni Vanessa y pio Andrew…nunca nos n’ haya nada”, asina por lo menos un polis a expresa awe ora a ricibi su macuto di Pasco. Henter e cuerpo a yega trabou awe y a haya un regalo como muestra di aprecio pa tur locual nan a haci den sirbi nan pais e aña aki. Aunke pa mayoria compania den sector priva esaki ta normal, pa polis e ta un “novedad”. Tur empleado di Cuerpo Policial Aruba a haya un macuto cu un termo grandi cu nan nomber graba riba dje. Pues a traha un termo personalisa pa cada empleado!

Altocomisario drs. Ramon Arnhem a huramenta dia 15 di augustus 2022 y a cumpli 100 dia apenas dia 23 di november ultimo. Por lo menos un di e retonan mas grandi cu el a topa cu ne ta un cuerpo di polis demotiva y cu masha hopi falta di guia y liderazgo. Masha lihe el a logra identifica e problemanan facil pa resolve y pone accion mesora en bes di promesa. El a realisa cu e mando policial existente, probablemente, e lo no por logra mucho di su metanan. El a atrae ex-altoinspector Robert Candelaria, cu a drenta recien den funcion di comisario y considera pa e polisnan awendia como e “man drechi” di e Korpschef. 

E macuto di Pasco ta un simpel detaye, pero e ta nifica mucho mas. E ta traduci su mes den cierto sentido cu porfin tin atencion personal, porfin tin un comisario cu su curason na e luga corecto. 

Polisnan a vocifera cu e ultimo hefenan tabata mas pendiente ki ora un polis faya, pa traha rapport contra dje y colg’e. Pero e polis cu haya accidente, n’ tin un comisario pa bay bishit’e na hospital pa puntra con a bay cu e salud. Esunnan malo na cas nunca a ricibi ni sikiera un yamada. Polis cu haya nan mes den un accidente na pia di trabou no por a conta cu presencia di un comisario na e sitio di incidente pasobra nan semper ta druk. “Awo tin cambio, awo tin co”, un di nan a expresa. “Ban spera e keda asina tambe, pa e politiconan no dañ’e na caminda”. 

Cuerpo Policial Aruba ta existi desde 1 di januari 1986. Ta conta cu mas o menos 600 empleado, parti entre polis y personal administrativo. Desde su nacemento el a conoce varios altocomisario, di cual un mas dedica na e cuerpo cu otro. Ta prome biaha den historia cu e tin un hefe studia den maneho di personal. Arnhem a caba HAVO y a sigui studia na Hogeschool di Utrecht, nivel HBO den e materia di “Personeel & Arbeid”. Despues el a bay Universidad di Amsterdam y a studia sociologia. E ta un sociologo academico, e ta un “maatschappijwetenschapper”.