Benny Sevinger na hues: Ni Ernst & Young ni Ministerio Publico por a haya algo contra mi

Diabierna mainta, ex minister, actual politico y parlamentario Oslin Benny Sevinger tabatin oportunidad pa hiba palabra como clausura den e proceso cu ta hiba den su contra y otronan como parti di e investigacion cu a yama Avestruz riba, entre otro, otorgamento ilegal di tereno.

Despues di saluda hues y miembronan di ministerio publico presente den sala, Sevinger a duna inicio na su ultimo palabra como parti di e huicio den su contra den caso Avestruz. El a cuminsa na bisa cu e, hunto cu su famia, tin seis aña caba ta biba bou di e acusacionnan di su contrincantenan politico y di ministerio publico. Tur dia e ta acusa falsamente door di media cu ta sostene nan y tin di soporta un prome minister cu no t alaga un reunion den Parlamento pasa sin tilda Benny Sevinger di ladron, corupto y criminal; y durante e ultimo cuater aña cu documento di e investigacion caminda aparentemente fiscalnan ta forma parti di e difamacion. Aki ta caminda Sevinger a cita fiscal ora el a bisa na hues comisario: “Pa mi Sevinger ta e hefe di un organisacion criminal grandi. Te hasta ora nos ta cla cu su interogacion, e mester keda cera te ora cu su caso bin dilanti.”

Prome cu papia riba e motibo pakico e ta hay’e para dilanti di mesa berde, Sevinger a splica hues mr. de Doelder con Aruba tabata na 2009 ya cu e ta considera esey ta necesario pa compronde miho e maneho cu el a hiba. Aruba tabata den un crisis financiero y economia cu perdida di poder di compra, desempleo, problemanan social, falta di perspectiva, fondonan di pension di biehes y di malesa casi bancarota y muchanan bayendo scol cu hamber ademas di ancianonan confrontando hopi problema.

E gobierno a dicidi di inverti den e mehoracion di ‘e producto Aruba’, loke tabata nifica inversion pisa den infrastructura, e cartera cu tabata Sevinger su responsabilidad. Hunto cu expertonan miembro di e Infra-Team, na dado momento tabata trahando riba mas di 105 y proyecto. Aki Sevinger a cuminsa menciona Green Corridor, renobacion di bario, etc y na dado momento hues a indic’e cu el a compronde cu tabata hopi proyecto y pa e salta e lista.

E acusado a bisa cu e no ta trece esey dilanti pa crea un impresion positivo, pero pa pinta e scenario den cual nan tabata traha y cua tabata nan meta dia y anochi. “Esaki tabata mi prioridad. Esaki tabata loke tabata wanta mi ocupa di dia y anochi. For di mainta trempan pa anochi laat,” Sevinger a expresa.

E ex-minister a splica na Hues cu su trabou den e otorgamente di tereno no tabata otro cu pusha pa mas tanto tereno sali pa stimula e sector di construccion y proyectonan comercial. “No tabatin tempo pa haci nada otro,” Sevinger a bisa. Den e otorgamento di tereno su maneho tabata pa trata tur hende igual pasobra tur hende tin e mesun derecho pa entrega un peticion y pa esaki pasa den e mesun proceso. Sevinger no tabata wak si e persona ta di partido berde of geel, blauw of core. Tur hende ta haya e mesun trato: “Director DIP Dezerzijds akkoord of Dezerzijds geen bezwaar, gaarne uw medewerking.”

Probablemente su contrincantenan no tabata contento cu e maneho aki. Por ta ministerio publico no ta di acuerdo cu e maneho aki. Pero esey tabata e maneho. Tabata dirigi tur hende pa DIP pa caba di atende cu nan peticion. Banda di esey, e tabata atende tambe cu e cartera di integracion cu tabatin tambe hopi problema y tabata exigi hopi tempo.

“Señor Hues, mi ta para bo dilanti, un hende homber, yiu di mayornan simpel, tata y politico cu tambe tin un famia. Mi tin un casa, un yiu muhe y un yiu homber y for di un aña pasa tambe un nieto. Mi tambe tin un mama, un ruman homber y rumannan muhe, amistad y sostenedornan pa cual tur mi ta gradici. Dor di bon y malo nan a sostene mi. Mi ta gradici cu nunca nan a perde nan confiansa den mi. Te hasta ora a kita mi derecho di participa activamente den e ultimo eleccionnan parlamentario; te hasta tras di tralie di prizon mi a keda eligi y saca mi mes como representante di pueblo.”

El a bisa su tras: “Señor Hues, mi no ta para aki pasobra mi ta Benny Sevinger, pero pasobra mi contrincantenan politico y ministerio publico ta kere cu mi maneho como minister tabata contra ley. Un tin motibo politico y e otro pasobra a dobla pa presion politico. Señor Hues, mi no kier uza bo tribunal como un foro politico, pero mi lo ta hortando abo y ami si mi no trece e puntonan aki dilanti.

Den e campaña politico di 2017, e anterior minister di infrastructura y un organisacion politico a entrega keho contra mi pa puro probecho politico. Den e gobierno nobo, dos parlamentario di MEP a bishita ministerio publico pa tambe introduci un keho contra e ex minister Sevinger. Nan a indica na e procurador general di e tempo ey cu nan no kier tene un encuesta parlamentario, pero ta prefera un investigacion penal door di ministerio publico. Te hasta a bay asina leu di bisa e procurador general, cu si no tin suficiente fondo pa e investigacion, esey no ta un problema paso nan lo percura p’esey den parlamento. Un luna despues nan tabata atrobe ta bebe koffie cerca e procurador general pa papia riba e avance di e investigacion. Despues di saca potret pa prensa, a anuncia cu e investigacion lo cuminsa. Tur hende a keda asombra con politica y politica partidista a influencia ministerio publico pa persigui mi pa asina elimina un contrincante politico. “Mi ta puntra mi mes si esaki ta normal den un pais cu un estado di derecho, caminda mester tin garantia pa separacion di poder. E tria politica ta existi solamente den teoria,” Sevinger a comenta.

Un par di luna su tras, e minister di infrastructura a bebe koffie cu e procurador general y a yega na e conclusion pa cuminsa cu un investigacion forensico pa busca echo contra ex minister Sevinger. Ernst & Young a h aci e investigacion aki cu a costa Pais Aruba 400 mil florin. E resultado tabata cu no tabatin nada pa indica cu Sevinger a haci algo contra ley. Al contrario, e rapport di e investigacion ta indica cu tin hopi espacio pa mehoracion den e procesonan di DIP.

Señor Hues, mi ta spaar bo henter e proceso di investigacion, detencion y interogacion, pasobra esta un trato inhumano esey tabata! 73 dia cera, di cual mayoria tabata den isolacion. 

Tur esaki ta describi den un opinion di e Magistrado di Corte Supremo Mericano, H. Jackson: “Si e fiscal ta obliga pa scoge su casonan, ta bin su tras cu e por scoge su acusadonan. Denn esey tin e poder di mas peligroso di e fiscal: cu e ta bay scoge hende cu e ta kere cu e mester bay pa nan, na luga di scoge caso cu mester trece dilanti. Cu e bukinan di ley yena cu un gran variedad di crimen, un fiscal tin un bon chens di haya por lo menos un violation tecnico di algun acto riba practicamente ken cu ta. Den un caso asina, no ta un cuestion di descubri e echo di un crimen y busca esun cu a comete, e ta un cuestion di scoge e persona y despues busca den e bukinan di ley, of pone un investigador traha pa haya algun ofensa riba dje. Ta den e teritorio aki, den cual e fiscal ta scoge un persona cu e no ta gusta of ta desea di humiya, of scoge algun grupo of hendenan poco popular y e ora ey ta busca un ofensa, esey ta e peliger di mas grandi cu ta sinta den abuso di poder di fiscal. Eynan ta caminda husticia ta bira personal y e crimen real ta bira esun di ta poco popular cu e grupo dominante of cu ta goberna, ta mara na e opinion politico robes of ta personalmmente fastioso pa e fiscal den e asuntonan di e fiscal mes.”

Den su ultimo palabra, Sevinger ta kere cu ora Fiscal a bisa loke el a bisa na Hues Comisario, ta caminda cu “el a bira personal.” A coy Sevinger y a despues, hunto cu recherchenan, a bay busca kico por a culp’e di dje. Sevinger: “Lag’e ta duidelijk. Despues di a busca den cantidad di compania, banco, negoshi offshore, pidi asistencia di Corsou, Panama, Hulanda, Barbados, Miami, Colombia, yen di informante, tap di telefon, video di camara, miles di emails, miles di whatsapp, MOT, inval y investigacion: no a haya nada.”

Caminda a bisa cu Sevinger tabatin miyones den banco na Aruba y den exterior, cu Sevinger tabatin un of mas cas na Miami, cu Sevinger a haya un condominio regalo, cu Sevinger tabatin un cuenta cu 2.4 miyon den un banco na Corsou, cu Sevinger tabatin un finca grandi na Colombia, cu Sevinger a biaha cu un maleta cu 400 mil dollar cash pa deposita na un banco na Miami, a resulta cu tur ta mentira y storia pa crea un sfera caminda e investigacion aki por tabatin un bida. “Nada ta berdad, ni un di e ponencianan falso aki ta sinta den e rekisitorio. Pero nos ta sigui busca, pasobra mester tin algo cu nos por gara Sevinger cu ne? No por ta asina cu e ta un persona honester y un politico!,” Sevinger a bisa.

“Kico mi a haci? Mi a haci mi trabou cu honestidad y consenshi. Hende tabata bin cerca pasobra mi ta accesibel. Contrario na loke ministerio publico kier laga bo kere. Durante mi 13 aña como parlamentario y, mas ainda, durante mi 8 aña como miinster, mi a scucha miles di ciudadano papia di e problemanan cu nan tin den comunidad. Mi ta para aki bo dilanti como un hues neutral y obhetivo cu mester kere den e berdad. Abo cu lo evalua e proceso di forma husto. Mi ta kere den Dios y mi lo pidi Dios pa ilumina bo den e decision cu bo ta bay tuma y cu bo decision lo limpia mi nomber,” asina Sevinger a finalisa su ultimo palabra den corte. 

Hues mr. de Doelder no a fiha un fecha pa duna su veredicto, pero a indica cu esaki probablemente lo ta durante promme kwartaal di 2023.