Benny Sevinger: “Landsrecherche a condena mi prome cu mi interogacion a cuminsa”

Diahuebs mainta trempan Ministerio Publico a cuminsa cu e parti di nan rekisitorio den e caso Avestruz unda cu tin diesdos acusado. Un di nan, Mary Winterdaal, ta na Hulanda y lo sigui e tratamento via di video conference ora cu trata su parti.

NADA NOBO

Pafo di Corte, nos colega Maritza Maduro tabata t’ey un biaha mas, unda cu el a combersa cu Benny Sevinger, cu a bisa cu e requisitoir di fiscal ta algo cu nan a spera caba, nada nobo a bin dilanti. E prome dia cu a interoga Benny na Sta. Cruz, nan a bin c’un ‘verhoorplan’, unda cu nan a bin scucha su banda di medaya, pa despues nan saca un conclusion si Sevinger a bisa algo cu no ta corecto. Despues di a hacie mas di 200 pregunta, na final a yega n’e conclusion cu a base di algun punto di e interogacion, cu lo acus’e di un serie di actonan criminal. E ora, segun Sevinger, ta kico tabata e meta pa haci e investigacion, si ya caba a yega n’un conclusion.

OBHETIVIDAD

El a puntra nan kico tabata e meta pa ten’e 73 dia cera, si na final ya caba e conclusion ta saca caba. Un biaha mas, Sevinger a reitera su ponencia cu e fiscal cu tabata encarga cu su caso, fiscal mr. Gerritsen, tabata un racista y tambe un narcista. Esaki ta algo cu e a sinti den carni propio, durante cu e tabata cera den KIA. Y aden e prome salida caba, Gerritsen a bisa cu su persona ta e criminal mas grandi di un organisacion criminal, cu Sevinger lo mester keda cera te dia e caso bin dilanti.  Pero den caso Avestruz, specificamente Sevinger, prome cu a interog’e, ya caba cu e conclusion ta saca. E ora e ta puntra su mes, kico ta e meta di haci un declaracion. 

EN BUSCA DI HUSTICIA
Por ultimo, Benny Sevinger un biaha mas a reitera cu ta inocente di tur loke ta acus’e di dje. Y cu e lo bay te n’e ultimo, e lo keda bringa. Awo a yega ora pa su defensa trece nan parti dilanti. Pero e lo sigui bringa te na ultimo pa demostra su inocencia.