Benny Sevinger: Henter e caso Avestruz ta riba redo di MEP

Awe e caso di Avestruz a continua, unda cu ex-minister Benny Sevinger tabatin menos participacion compara cu dialuna. Henter e caso di Avestruz a cuminsa a base di redo, presion riba Ministerio Publico.

Benny Sevinger, sospechoso den caso di Avestruz, a haya cu e caso a cana positivo. E forma con e caso a cuminsa cu presion politico, entregamento di keho na Ministerio Publico cu partido MEP, cu Tjon y Croes a pone presion riba procurador general pa cuminsa c’un caso. Esaki tabata basa riba redashi, basa cu Leoncita Arends a haya 90 mil meter cuadra, cu Benny Sevinger tabata parti di dje cu a bende miyones, incluso a papia cu el a haya 300 miyon florin.

Basa ariba redo cu e tin tres cas na Miami, di tin condominio aki na Aruba, cu e tin cuenta bancario na Corsou cu 2.5 miyon, etc. Awe den sala, Sevinger por a sinti di parti Ministerio Publico cu nan a cuminsa bay riba pregunta dicon el a firma dia 14 of di e verzoek cu a bin dia 15. Pero na ningun momento el a scucha cu Ministerio Publico a bay riba un cuenta di placa, of cuent’i unda e tin cas. Nada di eseynan a bin dilanti. El a sigui indica di por mira cu no tin ningun caso pa Sevinger caminda el a haya placa di ningun hende. Tampoco nan tin prueba cu hende a ofrece Sevinger placa of cu el a pidi placa, ningun telefon ni whatsapp. A cuminsa cu e caso aki puramente riba persecucion politico.

CARTA RIBA AANGIFTE ENTREGA

Awe, 25 di october, ta seis siman cu el a entrega un carta na Ministerio Publico. Sevinger entrega e carta puntrando riba e aangifte cu el a entrega riba e caso di Evelyn Wever-Croes. Nan a haci investigacion caba riba dje, pero tambe Ministerio Publico a bisa cu e ta pio cu e caso di Avestruz. Dicon awe cu ta un aña y mey mas leu, ainda no a cuminsa c’un investigacion. Seis siman a pasa y awe un biaha mas e ta bay entrega un carta na Ministerio Publico. E ta duna nan un siman mas. Nan no ta dunando e un contesta, segun Sevinger, e lo busca su caminda na HOF pa mira con e ta haya su derecho.

E kier sa con ta posibel cu dos contrincante politico cu asistencia di e compania di abogado Croes, Wever & Ruiz, cu ta esunnan a skirbi e contract pa Arends, cu a cobra 84 mil florin p’esey, no ta acusa nan di nada. Su persona cu no a haci nada ta esun acusa, pero nan mes ta esunnan cu a bay sinta cu dos parlamentario cu a bay entrega keho contra Sevinger.

Awe, despues di tres luna cu nan a entrega un keho, e caso contra Sevinger a cuminsa. Awe cu Sevinger ta un parlamentario, cu a entrega e mesun dossier, caminda ta confirma door di recherche cu e ta pio cu esun aki, un aña y mey despues ainda no a cuminsa. Ainda e no por haya un contesta riba dje. E pregunta cu ta bin aki ta cu cuanto midi Ministerio Publico ta midi. Cuanto presion partido MEP tin den Ministerio Publico. Sevinger ta respeta cu Ministerio Publico ta un instituto, cu ta bisa di ta onafhankelijk. Pero pueblo ta mira con bo ta actua, asina el a indica. Pueblo ta mira cu den caso di MEP, no kier actua pero den caso di AVP si, den caso di Benny Sevinger si.

Pa mas lesa TREMPAN.COM.