Benny Sevinger: Evelyn Wever-Croes tabatin mesun modus operandi

E siman aki a continua e tratamento di e caso Avestruz den Corte di Prome Instancia caminda hues hunto cu fiscalia tin oportunidad di haci pregunta tocante informacion cu a bin dilanti te cu awo. Posterior na esaki, parlamentario y politico acusa den e caso, Benny Sevinger a papia den programa di Enfoke caminda el a comparti publicamente detayenan di loke a sosode den sala di corte.

Sevinger a conta cu dia 28 di juli 2021 tabata su ultimo dia interogacion, momento cu el a bisa e Recherchenan “tende te kinan ma yega cu bosonan, min ta papia mas cu bosonan.” E agentenan cu Sevinger a identifica como Ruben Anthony Geerman y Bryan Ashley Fun, a keda insisti, pero un par di ora despues a stop. Na e momento ey Sevinger a puntra nan con a para cu mi denuncia cu e a haci y dossier cu el a entrega na Landsrecherche. Na esey, Geerman a bisa Sevinger den presencia di su abogado, mr. Illes cu “e dossier cu b’a entrega ta e mesun modus operandi cu esun di Leoncita.” Y ora a puntra kico nan ta bay haci, a indica cu no a tuma ningun decision ainda. 

For di e dia ey cu Sevinger a entrega e dossier te siman pasa, un aña y mey a pasa, mescos cu e carta cu e politico a manda pa Ministerio Publico indicando cu e ta wordo trata diferente cu ora Rocco Tjon y Endy Croes a bay entrege pamflet, un pida corant y nan si a wordo yama pa bebe coffee y den 3 luna e investigacion contra Benny Sevinger a cuminsa. Pero ora Sevinger a entrega loke nan mes a admiti di ta e mesun modus operandi, un aña y mey a pasa pa despues seponeer e caso y bisa cu no tin echonan castigabel. 

Durante e interogacion Sevinger a keda puntra Geerman con a para cu su denuncia na loke esaki a contesta: “No, no. Nos a wak e dossier, nos a habri e dossier, nos ta bezig ta pone den volgorde anto asina cu e ta cla nos ta bisa bo”. Awo con por ta cu abo ta bisa cu e ta mesun modus operandi anto un aña y mey PG ta manda mi un carta indicando cu no tin echo castigabel ta mescos cu PG bisa Leoncita cu e no a haci nada malo, e ta bisa señor Susubeek no a haci nada malo y e caso di awe mainta Damira no a haci nada malo.

E dossier cu Sevinger a entrega na Landsrecherche ta consisti di 500 pagina di documentonan original di DIP. Durante e entrevista, el a splica tambe e motibo pakico e documentonan aki ta den su posesion ainda. “No krantenknipsel mane cu Rocco Chong cu Endy Croes a entrega, ami a entrega e dossier original cu fechanan, cu firmanan di Evelyn, oficial. 

Sevinger a conta cu el a yama Ministerio Publico siman pasa net despues cu a lga sa cu a seponeer. El a yama e siman aki y a bisa di lo sigui yama pa e haya e dossier bek. “Si ta krantenknipselen e ta, mi ta bin mustra pueblo kico t’e krantenknipselen cu m’a entrega,” Sevinger a bisa indicando cu e lo hiba nan bek pa DIP despues. “Paso e cosnan ey no ta di mi, pero dios a obra cu ami a keda cu e dossiernan.” El a bisa di lo duna hues copia di nan tambe.

Pa e relato completo, lesa edicion di TREMPAN