Benny Sevinger (AVP): Ta duna impresion cu Evelyn Wever-Croes ta dicidi den Ministerio Publico

Parlamentario Benny Sevinger ayera mainta a mustra cu no ta prome ocasion cu Prome Minister Evelyn Wever-Croes, ta duna e impresion cu ta su persona ta esun cu ta dicidi den Ministerio Publico cua caso ta investiga y persigui, cua minister lo interoga y cua no.

“Mi persona un aña y mey pasa, a entrega keho contra di e lider di MEP na ministerio publico relaciona cu benta di un pida tereno, den cual Evelyn Wever Croes ta esun cu a percura pa henter e transaccion aki tuma luga. Den e periodo a detene mi y encarcela mi pa interogacion, mi a haci informacion relaciona cu e keho entrega y a informa mi cu e “feitenonderzoek” ta andando pero parce cu esaki ta tumando mas tempo cu tur otro caso cu tin.

Awor ora cu mi scucha Prome Minister bin dilanti y bisa cu e tambe lo bay averigua si en berdad mi a entrega keho contra di su persona, e ta mustra cu Ministerio Publico ainda no a bati na su porta pa cu e caso aki.

Aki mi tin cu mustra cu ya caba den pasado, Melvin Tromp, a yega di entrega keho contra di Evelyn pa motibo di echonan cu no ta cuadra cu reglanan di bon gobernacion caminda a favorece cierto oficina di abogado.

E tempo ey tambe Evelyn a bin dilanti y entrega un keho como “smaad” contra di Melvin Tromp, indicando cu Melvin ta susha su nomber sin tin mester y kico Ministerio Publico a haci, a dicidi cu ta trata di un caso di cos politico contra di otro y a dicidi di seponeer ambos caso, pues no tabatin investigacion contra di Evelyn.

Kico nos ta mira awor, ta cu un biaha mas e lider di MEP ta bin dilanti y anuncia cu e lo bay entrega keho contra mi persona pa motibo cu mi lo ta susha su bon nomber, esta mesun tipo di “smaad” aki, purbando pa logra mesun resultado cu e  tabatin contra di e keho entrega pa Melvin Tromp.

Aki ta presenta un situacion sumamente interesante ya cu mi a wordo sigura pa propio oficialnan envolvi den e investigacion cu loke mi a entrega como keho contra di Evelyn, ta cos hopi serio cu ta rekeri sin duda un investigacion cual ainda despues di un añsa y mey, no a tuma luga.

No tin un ‘onderzoek” oficial ainda contra di e Prome Minister mientras cu e documentonan envolvi relaciona cu benta di e tereno di gobierno aki pa 17 miyon dollar, ta confirma e rol determinante cu  Evelyn a hunga, corespondencianan caminda ta confirma su intervencion y participacion, haciendo negoshi cu tereno di gobierno.

Ta di spera cu Ministerio Publico inicia cu e proceso, inicia cu investigacion oficial contra lider di MEP y no bay hunga e tipo di wega di “smaad” pa considera e asunto serio aki, como un asunto politico pa asina permiti Prome Minister bay liber di e acusacionnan serio aki.

Evelyn no mester sconde tras di caso di Benny, ya cu mi caso cu ta un persecucion politico, tin cinco aña caba andando pero e momento a yega  pa  Evelyn bin duna cuenta di negoshi den cual e tabata envolvi cu tereno di pueblo”, Benny Sevinger di fraccion di AVP a declara.