Basora Bolas Team a celebra binticinco aña

Diasabara anochi, Basora Bolas Team a celebra nan aniversario di plata. Es decir, nan a recorda 25 aña di nan fundacion, riba dia 15 di september 1997 y dia 27 di september di e mesun aña, nan a batisa nan prome uniform.

Judith Winterdaal-Barrera, presidente di Basora Bolas Team, a bisa cu nan ta celebra 25 aña di existencia. E ta spera cu e dia di mañan, su famia por sigui cu e team. Tabata 25 aña pasa, cu Ignacio Wernet, miho conoci como ‘Daddy’ a lanta e team y a nombra Judith como presidente, cual posicion e tin te awe.

Na comienso, nan tabata hunga pa un otro team, esta Flying Ball. Pero riba un dia, Daddy a acerca Judith pa puntr’e si e lo ta interesa pa forma parti di e ekipo cu e lo bay lanta.

E nomber Basora a bin door di e tata di Judith, Miguel Barrera d.f.m., cu tabata gusta boto miniatura y e tabata tin un boto cu e nomber Basora, un boto cu a yega di gana hopi premio. Pero su casa a gusta e nomber Basora y Daddy tambe a gust’e. Te awe e nomber Basora a keda mesun cos. Den un futuro, t’e yiunan di Judith lo mester sigui carga e team. Na 1997, Basora a cuminsa como ekipo mixto y na 1998 nan a bin cu e ekipo hubenil, damas y cabayero pa competi den torneo di 18 di maart. Na 1999, e ekipo di cabayeros a bay Caracas, pa un torneo internacional y nan a keda na di cuater luga. Asina tambe e team di damas tambe a cuminsa bay competi afo, unda a gana titular di campeon y sub-campeon.  Na varios ocasion, den competencia local, nan a keda como campeon, sub-campeon, di tres y di cuater luga. Pero tambe nan a yega di cay afo hopi biaha.