Barracuda a gana campeonato di Bola 8

Prome cu continua cu e relato aki, nos kier a publica cu porfin e misterio di holo stinki aya na Pos Abou a keda resolvi. Detective Kelkboom a informa cu den un pos aya na Pos Abou y vecindario a haya un cantidad di cacho morto cu a shiwata un dos siman pasa cu Barracuda.

Enfin, caso cerado, y diasabra anochi ultimo, e gran palacio di biyar aya na Tanki Leendert tabata tin un atmosfera carga cu adrenalina ora e dos powerhousenan den biyar bay enfrenta otro den e bataya final pa determina ken lo bira campeon 2022 den e grandioso torneo anual di FEBIAR pa ekipo den bola 8. Steelers BT tabata ful ekipa, Barracuda BT, e team clasico den bola 8, tabata ful charge, y exactamente 8’or e desenlace a cuminsa.

The Wolfman, Richard Wolff, di Barracuda a sali gana Roukos di Steelers cu 2-1, y Barracuda a piki bay dilanti cu 1-0. Mes ora e contesta skerpi a bin di Steelers den persona di Fredley Tromp, kende sin piedad a baha Johnny Bravo for di su ‘cloud powered by boter plat’. Cos tabata priminti di ta un anochi hot, score tabata 1-1.

E legendario Martin Apeldoorn di Steelers ta ‘kom net een balletje te kort’ contra ‘Ojo de Aguila’ Ransley Tromp, y Barracuda a bolbe bay dilanti cu score di 2-1. Tin papia den ‘wandelgangen’ cu otro aña no ta permiti wowonan bionico cu laser mas. Otro hungado clave di Steelers, Markito Farro, a ‘bite the dust’ contra Odor di Barracuda, kende a bay dilanti cu 3-1.

A yega ora p’e Scotch Doubles. Barracuda a hinca David Brete y Roden Pinoi contra e dos legendarionan di Snack Ranch, nada menos cu ‘Le Bon Bon’ Evertsz y Marco Tromp. Ora wak e duo di Barracuda hunga, bo ta haya e sensacion cu ta dos ingeniero di NASA ta trahando. Cada angulo, cada distancia, cada efecto di bola ta ser discuti y analisa extensivamente door geodetico David y assistent Pinoi, pero asina mes e raket a crash durisimo contra e baranca blauw di Elvis Evertsz y Marco Farro. Steelers a corta bentaha te na 2-3.

Steelers kier a pusha un breakthrough den persona di Juancho “The Devil” Ridderstap, pero Jorzinho Everon a keda calmo manera e exorcista di Hollywood, y cu 2-0 a saca e diablo for di Tanki Leendert. Barracuda on top cu score di 4-2. Finalmente, un berdadero bataya di nervio a inicia, ora cu Ditto Acosta di Barracuda a enfrenta Emile Kock di Steelers. Tension halto ta pone ambos den “code colio” y nan tabata comete varios pifia y eror, pero na final Ditto a demostra di tin nervionan c’un porcentahe un tiki mas halto di staal cu esun di Emile di Steelers, y cu score di 2-1 Ditto a pone cu Barracuda a triunfa y bira campeon 2022 cu score di 5-2.

Un pabien grandi ta bay pa Barracuda y Steelers, y tambe na FEBIAR pa un torneo sumamente exitoso.