Banco Central di Aruba: Economia a sigui crece den e di dos trimester di 2022

Awe Banco Central di Aruba (BCA) a publica “State of the Economy” pa e di dos trimester di 2022. E publicacion aki ta duna un resumen di e desaroyonan economico local y internacional di e periodo aki. E puntonan mas importante relaciona cu e parti domestico ta presenta abou.

Den e di dos trimester di 2022, e economia di Aruba a continua riba su trayecto di crecemento, compara cu e mesun periodo di 2021. E crecemento di 5,7 porciento den Producto Bruto Domestico (PBD) real a deriva for di e impulso positivo continuo den e sector turistico. Indicadornan di inversion y consumo a demostra un expansion den actividad economico.

E mehoracion persistente aki tabata conecta cu un subida den e cantidad total di turista y cantidad di anochi di turista, cu a hiba na un crecemento den operacion di hotelnan (Tabel 1).

Den e prome mita di 2022, Aruba a conoce un subida di 61,9 porciento den cantidad di turista compara cu e prome mita di 2021, y a yega te na 91,8 porciento di e nivel di 2019 (pre-COVID). Un aumento den e turistanan procedente di Merca (+46,5 porciento) a conduci na e cantidad halto di turista, como tambe un crecemento den tur mercado. E mehoracion den demanda turistico a causa un ampliacion den e indice di ocupacion di hotel (+63,1 porciento) y otro e indicadornan di e sector hotelero. Banda di cantidad total di turista, e bishitantenan di crucero tambe a contribui na e recuperacion, registrando un crecemento di 16.481,0 porciento compara cu e aña anterior

Tabel 1: Indicadornan di Turismo pa Aruba
Q1-Q2 2022 compara cu Q1-Q2 2021
	2021	2022
Cantidad di turista	326.383	528.325
Promedio di duracion di estadia (den cantidad di dia)	7,4	7,2
Cantidad total di anochi di turista	2.424.402	3.825.924
Bishitante di crucero	1.589	263.472
Indice di ocupacion di hotel (%)	44,7	71,1
Promedio di tarifa diario (den US$)	255,8	316,7
Entrada hotelero pa cambernan disponibel (den US$)	114,4	225,2
Entrada turistico pa anochi (den Afl.)	451,1	461,6
Entrada turistico* ( Afl. miyon)		1.093,8	1.766,2
Fuente: CBA, ATA, AHATA, APA, CTO, STR *Solamente esunnan registra na banconan comercial local

Mayoria indicador a demostra e señalnan positivo, indicando un subida den consumo. Dos di e indicadornan aki, esta BBO y BAVP (+33,1 porciento) y impuesto riba mercancia (+21,0 porciento), a subi door di un combinacion di mas actividad turistico y un aumento den consumo local (Grafico 1). E subida den consumo aki por ta nota den e deficit comercial di Aruba, cu a mira un expansion di Afl. 263,5 miyon, deriva for di e aumento den importacion (+31,3 porciento) debi tambe na prijsnan mas halto di importacion.

Ademas, un gran parti di e indicadornan di inversion a mustra mehoracion compara cu e prome mita di 2021. Entre e indicadornan aki, e balor di metal basico importa y e trabounan deriva a crece cu un notabel 39,3 porciento den e prome mita di 2022 ( jan-jun 2021: -9,8 porciento), mientras cu e balor di makinaria importa y ekipo electrotecnico a mira un subida di 23,6 porciento (jan-jun 2021: +6,2 porciento). Adicionalmente, den e prome mita di 2022, hipoteca comercial y di vivienda a demostra un expansion den ambos balor y cantidad compara cu e prome mita di 2021.

Den liña cu desaroyo internacional di e prijsnan, e Indice di Prijs di Consumidor (CPI) a sigui riba e tendencia di subida yegando un nivel di 103,3 den juni di 2022. E subida di 5,3 porciento den e inflacion periodo ultimo por atribui primordialmente na e prijsnan di gasolin (+2,9 punto di porcentahe) y cuminda y bebida non-alocholico (+1,2 punto di porcentahe). Adicionalmente, e inflacion periodo ultimo, cu ta exclui comestibel y energia, a suma un total di 2,0 porciento compara cu -0,4 porciento den juni 2021. E indice di inflacion a base di promedio anual a aumenta te na 3,4 porciento na final di juni 2022, continuando su trayecto di subida. Sinembargo, e indice di cambio real di florin Arubano vis-à-vis e dollar Mericano a baha durante e prome mita di 2022. E tendencia aki ta resultado di e prijsnan di consumidor cu a subi mas rapido na Merca compara cu Aruba.

E transaccionnan internacional a traves dje banconan comercial a resulta den entrada netto significante di divisa na balor di Afl. 402,7 miyon pushando e nivel di divisa internacional na Afl. 3.286,8 miyon (incluyendo oro y excluyendo diferencia di reevaluacion) (Grafico 2). Tanto e cuenta coriente como e cuenta financiero di e balansa di pago a contribui na e resultado aki, registrando un fluho netto di divisa na balor di, respectivamente, Afl. 315,0 miyon y Afl. 107,4 miyon. E aumento significante den divisa internacional a surgi di entrada turistico registra na e banconan comercial y prestamo procedente di Gobierno Hulandes na Gobierno di Aruba pa cubri su debenan externo cu ta vence den 2022. Consecuentemente, e nivel di divisa internacional a keda adecua segun e puntonan di referencia di BCA.

Durante e prome mita di 2022, basa riba informacion disponibel, e deficit financiero di Gobierno di Aruba (GoA) a reduci te na Afl. 16,8 miyon, Afl. 313,3 miyon menos compara cu e mes un periodo di 2021. E contraccion aki tabata debi na un caida den e gastonan publico (-Afl. 161,5 miyon), y un subida robusto den entrada di gobierno (+Afl. 151,2 miyon). A pesar di e crecemento cu por a nota den e entradanan di gobierno den e prome mita di 2022, el a permanece bou di e nivel di 2019 (90,3 porciento di e nivel di 2019), indicando cu ainda falta pa yega na un recuperacion completo. Na final di juni 2022, e debe di gobierno a yega Afl. 5.969,0 miyon compara cu Afl. 5.655,6 miyon na december 2021. Un expansion di Afl. 243,5 miyon den debe externo a causa e debe mas halto aki. E proporcion di debe pa Producto Domestico Bruto a aumento cu 0,6 punto di porcentahe y a yega te na 101,7 porciento na final di juni compara cu fin di 2021.