Ban Dal Bocht Bike Life tin uniform nobo

E miembronan dje grupo di brommer Ban Dal Bocht Bike Life a bini pa asina pasa un momento ameno na momento di batisa nan uniform. Nan ta bay cumpli un aña di existencia, pero no ta solamente enfoca di ta riba brommer so. Nan tin plan recreativo y ta zorg pa haci cos sano.

Alvin Brito, lider di Ban Dal Bocht Bike Life, di basta tempo caba kier a bin cu un grupo. El a indica cu hopi biaha hende ta bisa cu nan ta coredo di brommer so y ta haci esey so. Pero e grupo aki ta haci deporte manera kickball, beach tennis, y otro tipo di cos diferente. E union den motociclistanan ta conta hopi pa Brito. Aruba ta un isla chikito y pakico no tin e union den nan tur ta asina grandi. Nan tur gusta deporte, tur gusta loke ta brommer, y p’esey e idea a bin dilanti pa trece union, pero tambe respeta otro.

Nomber di Ban Dal Bocht Bike Life a bin door di algun integrante cu tabata cu nan y a bay, di cual Brito ta gradici na nan pa pone nan granito di arena. Ban Dal Bocht Bike Life a bin pasobra ta bay un caminda y topa amigo, y ta scucha hopi biaha e palabra ban dal bocht. Di eynan e concepto di Ban Dal Bocht Bike Life a bini. Asina el a sigui cana y te fecha di awe e ta un exito. Segun Brito, dia 9 di december proximo nan ta haci un aña di existencia.

Como cu Ban Dal Bocht Bike Life ta bay haci un aña di existencia, den menos di un aña tin tres T-shirt. El a gradici Esther Jones p’e printing. E miembronan a bini hunto pa asina batisa nan uniform, ya cu a yega e momento pa comunidad di Aruba cera conoci cu e caranan di Ban Dal Bocht Bike Life. Tambe nan a habri un pagina di Facebook, unda cu nan kier educa, kier pone cos positivo y nada descabeya. Nan kier mustra cu nan ta coredo di brommer, deportista, ta respeta automobilista y duna respet pa haya respet.