AVP ta organisa e prome simposio: “E Restauracion Di e Bon Comun”

Fundacion Digna Lacle Hererra den cooperacion (FDLH) cu Plataforma Hobennan Profesional (PHP) y Fraccion di Partido AVP a anuncia e prome simposio cu e tema “ The Restoration of the Common Good”. 

E simposio aki a keda anuncia diabierna ultimo durante conferencia di prensa  y lo tuma luga dia 29 di september 2022. E Bon Comun ta un tema cu a recobra importancia den e mundo academico, economico y politico. E bunita di e concepto di e BON COMUN, ta cu e ta un principio cu ta unifica un pueblo pa un causa y aspiracion colectivo.  Lider di Partido mr. Mike Eman, Parlamentario Dr. mr. Ryçond Santos Do Nascimento representando Fundacion Digna Lacle Herera y Wendrick Cicilia representando Plataforma Hobennan Profesional a duna inicio na un e reflexion nacional cu lo sosode diahuebs 29 di september 2022 den aula di EPI pa 7:00 di anochi riba e Bon Comun di pais Aruba.

Lider di partido mr. Mike Eman a subraya e echo cu escritor y pensadonan grandi  manera economista y professor di Harvard Michael Sandel y Rabbi Jonathan Sacks a orienta nan mes riba e retonan grandi cu e paisnan ta enfrentando cu nan sistema economico y politico y ta reflexiona riba e Bon Comun como un punto di salida pa por crea un desaroyo positivo. Internacionalmente tin un reflexion profundo riba e Bon Comun y Aruba tambe mester participa den e reflexion importante aki. 

Parlamentario Dr. mr. Ryçond Santos Do Nascomento a indica cu ta momento pa transforma un mentalidad di competencia den un mentalidad di cooperacion. E mensahe importante ta cu na momento sector economico, comercial, sindical y gubernamental fiha como un guia moral e Bon Comun, nos por crea un causa comun atrobe cu nos tur por traha cu animo pa logra un desaroyo positivo atrobe pa Aruba. Nos por realisa esaki solamente si nos bin hunto y traha hunto pa mehora e bienestar di tur nos ciudadanonan cu ta forma parti di nos sociedad.

Wendrick Cicilia a anima e hobennan cu nan tambe tin un responsabilidad cu e Bon Comun di pais Aruba. Ta momento pa nos transforma e mentalidad di pensa solemente riba propio interes y mira e panorama mas amplio y colectivo. E ta importante pa nos hobennan realisa cu nan tambe tin un participacion grandi pa duna den e renobacion di pais Aruba cu nos ta desea y anhela.

Lo tin un lista di orador sumamente inspirativo cu lo presenta y comunica e necesidad di un reflexion riba e Bon Comun. Formando parti di e lista di oradornan lo ta varios lider spiritual cu lo amplia riba e peso moral di un reflexion riba the E BON Comun, Lidernan academico  lo subraya e corelacion entre e Bon Comun y enseñansa y alabes lo tin un orador internacional directamente for di Harvard cu lo papia na un generacion di hoben y nan responsabilidad pa cu e Bon Comun di pais Aruba y tambe lo tin un orador cu lo enfatisa e importancia di e un perspectiva di e Bon Comun pa e mundo economico y comercial 

Ta haci un yamado na comunidad di Aruba pa asisti e prome simposio cu tema “E Restauracion Di e Bon Comun”, dia 29 di september 2022 pa 7:00 di anochi. Un sociedad no por funciona y ta uni si e BON COMUN no ta for parti esencial di e guia pa e desaroyo y vision pa e pais y e pueblo su felicidad.