AVP: Prome simposio a inicia cu reflexion riba e Bon Comun

Prome simposio riba Bon Comun tabata hopi bon atendi cu un sala completamente yen di e aula di EPI y a conta cu un contenido hopi profundo cu un bateria di lectura hopi impresionante y inspirativo. 

Den un tempo di negativismo, decadencia moral y politico, den un tempo cu ta parce cu no tin alternativa pa miho gobernacion, den un tempo cu miedo y indiferencia ta parce di ta e contesta riba abuso y desesperacion, ta parce cu tin speransa pa futuro. 

En bes di laga rabia y frustracion hiba na pesimismo y indiferencia, tin hende cu ta sigui busca salida pa sali for di e abismo di negativismo y desesperacion cu idea y iniciativanan nobo. Crea un forma nobo di traha, ta e contesta riba e situacion di “friends and family”, di incapacidad y falta di iniciativa. E simposio di Fundacion Digna Laclé Herera (FDLH), di siman pasa riba e tema di “RESTAURACION di BON COMUN”, a resulta di ta un lus den scuridad cu por bira e mecha cu ta inspira y motiva hopi mas hende hoben y no hoben, pa pone man na e trabou mas grandi y importante cu nos pais tin awor aki: esta, rechasa negativismo y indiferencia; nenga di acepta incapacidad y falta di creatividad; bisa no na egoismo y trato preferencial y pone tur nos capacidad y experiencia traha na bienestar di henter nos comunidad y den tur cos cu nos haci. 

Fundacion Digna Laclé Herera (FDLH)

Tres organisacion a carga e simposio: Fundacion Digna Lacle Herrera, Plataforma Hobennan Profesional y Fraccion di AVP. dr. Ryçond Santos Do Nacimiento, presidente di FDLH, Wendrick Cicilia di Plataforma Hobennan Profesional y ex-Prome Minister y lider di fraccion di AVP mr. Mike Eman a lansa e concepto den un conferencia di prensa conhunto. Nan por wak bek riba un meta cumpli. E symposio tabata bon planea den tempo y exacto den su meta.