AVP: Nos tin cu wak con nos ta anda cu democracia na cas

E echo cu e islanan den reino no tin un representacion den por ehempel Tweede Kamer ta sinti cu e preocupacion y dolor ta biba. A papia di cambio cu mester a haci den statuto of no. “Pero nos ta biba diariamente e echo di tin un deficit democratico,” ta loke cu miembro di fraccion di AVP, parlamentario Gerlien Croes a comenta riba e di tres dia di IPKO na Den Haag.

E ta sigui comenta cu na Aruba tambe ta hopi cla cu n’e momento aki ta bibando den un deficit democratico hopi grandi, pa motibo cu e partidonan cu tin mas hopi voto na Aruba n’e momento aki, conhunto ta representa mayoria di e votadonan na Aruba, tin un representacion den oposicion y no den gobierno.

Esey tambe ta un deficit democratico, pasobra loke pueblo a scoge en realidad, no ta n’e momento aki esunnan cu ta tuma e decisionnan pa nan. Fraccion di AVP sa ki dolor e ta pa biba tanto aña cu toch ta sinti cu tin menos bos y menos habilidad pa tuma decision na fabor di un comunidad.

Un palabra cu a bolbe bin dilanti ta dialogo, segun Croes. Tin hopi ainda pa saca for di e constelacion manera cu e ta y for di e statuto mes  cu tin. Diamars Croes a elabora un tiki riba e proceduranan pa traha riba rijkswetten. A base di dialogo ta hopi importante pa purba saca e mas hopi posibel y e mas positivo posibel cu tin hopi mas pa saca ainda, cu loke a saca te awo, for di e forma cu e statuto ta hinca den otro.

WAK DEN NOS MESUN CAS PROME

Parlamentario Rycon Santos do Nascimento a comenta cu prome cu bay wak e ‘democratie deficit’ den reino, nos tin cu wak con nos mes ta anda cu democracia na cas.

E ta sigui splica cu ora mira e calidad di e reunionnan publico na Aruba, ora cu ta mira con e presidente ta anda cu e reunionnan, ora cu ta mira un coalicion ta apoya e gobierno ciegamente den tur instancia, e ora kier bin Hulanda, bringa pa ‘hef op’ democratie deficit.

No tin ningun credibilidad, no tin ningun firmesa y base moral, pa por para rib’e ponencianan.

REPRESENTACION DEN PARLAMENTO HULANDES

Parlamentario Arthur Dowers a comenta cu un punto cu a bin dilanti cu por tin representacion den parlamento di Hulanda. Esey ta un posibilidad, pero no ta kita e democratie deficit. E ta duna bo un posicion mas fuerte den trece opinion dilanti y sa kico ta biba dilanti reino.

Tin un minister plenipotenciario, Dowers a comenta. Pero a caba di mira un cu a bay cu no a sirbi pa nada, cinco aña tira afo. Si haya hende cu no ta sirbi, buta den posicion, no ta bay saca nada tampoco.

Un otro cos importante ta cu por a tende diamars un Staatsraad bisa pa stop di nombra friends & family. Si partido MEP bin den gobierno, keda manda nan friends & family, sin wak interes di pueblo, sin wak ta bin pa representa e interes di Aruba, ta percura por ehempel e studiantenan, pa nan ta bon informa. Si no haci ningun di e cosnan aki, tanto bal tin un representacion of lag’i tin representacion.

Ora cu Dowers scucha e discusion academico, ta perdemento di tempo. “Ban papia riba cos cu berdaderamente ta yuda e paisnan bay dilanti, na luga di sinta discuti.” E no ta cambia e posicion di e pais, e no ta bay cambia tampoco cu no ta bay tin democratie deficit.

Dowers ta sigur cu tin partner na Hulanda ta sinti cu tin democratie deficit. E realidad ta cu si berdad bay papia cu otro pa participa as, pa tin mas influencia y mas informacion, kier contribui mas n’e desaroyo y interes di nos pueblo, ta un discusion cu por hiba. Pero no mester laga gaña cu ta bin cu un solucion pa democratie deficit.

Aworaki Hulanda ta den e posicion di 17 miyon hende cu nan tin e mayoria. Si Aruba tabata den posicion ey, lo tabata e mesun cos.

KICO TA DEMOCRACIA

E problema di mas profundo ta ‘kico ta democracia y kico kier logra cu democracia,” ta loke cu parlamentario Santos do Nascimento a splica. Eynan ta locual cu a mira ta, cu democracia ta nifica cu cada ciudadano mester tin e oportunidad pa participa den e discusionnan publico. Cada ciudadano  mester tin e oportunidad pa forma parti di e decisionnan p’e futuro.

Aki ta bin e importancia di hende prepara, capacita pa representa e pais na Hulanda.

Pakico? Pasobra kier hende capacita pa nan sinta na mesa, papia y vocifera e interesnan di Aruba na un manera digno. Asina participa di e decisionnan.

Si yega n’e punto ey, e ora por hasta uza hopi di locual e statuut ta trece dilanti caba. Tin espacio pa cambio, segun do Nascemento si. “Tin boluntad politico na Den Haag. Mi no ta kere. Tin boluntad politico pa cambia na Aruba, mi tambe ta duda,” ta loke e parlamentario a bisa por ultimo..