AVP: Na Hulanda a recorda e islanan cu autonomia no ta nifica ta autonomo

Varios delegacion di parlamento ta na Hulanda, pa asina participa den e reunionnan di Inter Parlamentaire Koninglijk Overleg (IPKO). 

DEFINICION ARTICULO 43 INCISO 2 DI STATUUT

Diamars tabata e prome dia di IPKO unda cu a tuma luga un debate den Tweede Kamer. Den cuadro di esaki, mr. dr. Ryçond Santos do Nascimento, parlamentario pa partido AVP a cuminsa na bisa cu nan a haya oportunidad pa haci algun pregunta na dos miembro di Staatsraad cu tabata presente pa duna presentacion. 

Un di nan a presenta e posibilidad di un definicion nobo di articulo 43, inciso 2 di Statuut. Pero mester realisa kico esaki ta bay nifica pa e ciudadanonan di Aruba, Corsou y St. Maarten. Esaki tabata e motibo pa cual el a haci un pregunta specifico, ya cu si kier defini e articulo aki di nobo, con gobierno di Reino lo tuma responsabilidad pa e maneho di desperdicio na Aruba, e problema di RWZI, problema na dump. Gobierno di Reino no por core pa su responsabilidad, si e kier interpreta articulo 43, inciso 2 di nobo. Hopi biaha Hulanda, ora ta trata placa, e ta hala atras. Varios parlamentario di Hulanda mes tabata di acuerdo cu e ponencia di e parlamentario, mescos cu Raad van State.

Ora bo tin poder, e ta nifica, principalmente, un responsabilidad como ciudadano. Fraccion di AVP a bin prepara durante e diferente momentonan, a duna un bijdrage na e diferente discusionnan y representa Aruba dignamente. 

Loke a hala atencion cu Hulanda, durante e debate, a recorda e islanan cu autonomia no ta nifica cu ta totalmente autonomo, cu tin cierto limitenan na e autonomia. Esaki ta algo cu na 2015 ya caba Santos do Nascimento a hiba charla caba riba dje, unda cu autonomia no solamente ta un derecho, pero tambe un responsabilidad. Hulanda no solamente a adopta e pensamentonan aki pa cu e islanan, pero e derechonan di Hulanda no solamente ta un derecho di Hulanda, pero tambe un responsabilidad. 

Door di nombra hendenan cu no ta capacita den posicion pa representa Aruba na Hulanda, door di nombra friends & family, esey ta haci nos autonomia zwak. Door di tin minister incapacita na Hulanda, esey ta bende Aruba su economia, esey ta locual ta caba cu nos economia. No por tuma e derechonan cu tin y e responsabilidad pa cu e ciudadanonan di Aruba y pa cu Reino den su totalidad. 

RAPPORT DI TRATADONAN INTERNACIONAL

Den Tweede Kamer, e delegacionnan a ricibi un presentacion di Raad van State, di un rapport di cual nan a haci un investigacion riba dje, unda nan a saca un conseho pa Gobierno Hulandes, unda cu a mustra cu tin hopi tratado internacional cu tin di haber cu p.e. derecho humano, climatologico cu e islanan no ta logra. 

Segun parlamentario, mr. Gerlien Croes, esaki ta pa motibo cu no tin capacidad, ni tampoco e e placa necesario pa por cumpli cu nan, unda cu nan mester di mas ayudo.

E discusion tabata con Hulanda y con Reino hunto, por garantisa cu ora cu e islanan ta parti di e derechonan aki, cu nan tin pa carga con pa ehecutanan e ley- y derechonan. Cu mester di ayudo y con ta yega na esey. 

Riba esaki tabata tin un discusion basta largo y interesante, e parti di e statuto a bin dilanti. E articulonan cu a trece dilanti, ki rol Hulanda tin cu ta garantisa cu tur hende ta wordo trata y e mesun beneficionan como parti di Reino. A parti e e gruponan pa papia over di e Consensus Rijkswetten. Un discusion cu tabata hopi al caso den e ultimo aña pa aña y mey, pa locual ta e Ley di COHO.

Tin un dolor cerca mayoria di e islanan, di con e proceso a encamina pa yega na esaki. Hopi ta sinti cu a maluza nan poder pa nan impone algo. Hopi di e conclusionnan tabata cu, lo mester defini un proceso adecua, con ta yega na un Consensus Rijkswet cu Hulanda. Y alabes, no mester lubida nunca na ken su nomber ta haci esaki, ken ta representa: e interes di e comunidad.

Esaki ta e parti importante, pa consulta cu pueblo y comunidad, unda cu ta bezig c’un ley c’un embargadura asina grandi cu tin un efecto pisa riba e pueblonan cu nan ta representa.

Den e parti ey, Croes tabata un di e Deelgroepnan unda a presenta e conclusion di e deelgroep aki. Tin hopi punto cu ta bin dilanti, unda c’un biaha mas ta bisa, cu dialogo y representacion, unda cu e interes di e politiconan ta hopi importante, pa determina e procesonan, e formanan cu ta anda cu otro den Reino. 

Por ehempel, e ley di COHO, cu RAft, e parlamento di Aruba ta ful for di e proceso cu ta wordo encamina, unda cu tin un otro alternativa riba e ley di COHO, cu parlamento no sa di dje. 

Esaki ta un muestra di e falta di dialogo den e procesonan y tambe e participacion di nan como miembronan di Staten. Lo mester traha hopi duro riba esaki, pasobra cu como fraccion di AVP, Croes a bisa, cu nan ta kere den Reino, den colaboracion den Reino, pero e no ta bin sin mas, e no ta bin sinta na cas ta warda kico ta bin pasa. 

“E interes como politico mester ta pa sali afo pa bay en busca di oportunidad pa e futuro di nos pais y di nos hendenan. E situacion di nos pais, no ta esun di mas facil y mester sali en busca di solucion pa Aruba”, Croes a finalisa bisando. 

Pa un relato mas amplio, lesa TREMPAN.