AVP: E solucion di tur problema na Aruba ta un cambio di gobierno

“E miho solucion pa Aruba por sali di e problemanan cu nos tin riba tur tereno, specialmente di e aumento drastico di costo di bida, ta pa e gobierno cambia su maneho of pa cambia e gobierno mas lihe posibel. Asina algun participante na e evento di “Talking Politics” a resumi e atardi den Cas di Partido. E sala tabata yen di hende hopi preocupa cu e situacion na Aruba cu ta bira pio cada dia. E participacion di sala den e discusion tabata grandi atrobe. Conclusion: “mester bini cambio lihe!”

E evento bi-mensual di AVP na Cas di Partido riba diabierna atardi a trata e siman aki e tema di recibonan halto pa awa y coriente cu casnan di famia y negoshinan a ricibi e dianan cu a pasa. E mes un dolor y preocupacion cu a sinti durante di siman na radio, riba medionan social y den barionan, a sinti den Cas di Partido. Miembronan di e panel invita tabata e comerciante sr. Frans Lejuez cu tabata hopi preocupa y cu a splica e consecuencianan serio di e aumentonan aki pa henter nos economia.

Daniela Speijer, doño di un negoshi chikito tabata hopi preocupa pa su negoshi, su trahadonan, nan famia y pa e futuro di tur e negoshinan chikito na Aruba. Clifford Heiliger, ex-sindicalista y candidato riba lista di AVP, a splica e problemanan cu WEB/ELMAR tin cu e maneho di e gobierno actual. E impacto grandi cu e aumento di prijs di awa y coriente ta bay tin riba famianan, riba negoshinan y riba henter economia di Aruba tabata central den e discusionnan cu henter ora tabata dirigi riba busca solucion. Pero pa haci cos ainda pio, a bin realisa for di e discusion cu e aumento di prijs di awa y coriente cu nos a haya awor no ta e final: tin mas aumento ta bin pa fin di aña of comienso di aña nobo. Kier men cu e dolor grandi, e impacto negativo riba costo di bida y riba nos economia no a caba aki. E ta bay bira pio !

TIN SOLUCION

Manera semper no a para keto na menciona problemanan y nan consecuencia so. Semper ta busca y discuti posibel solucionnan. Esey ta e meta tambe di e eventonan di “Talking Politics”. Diabierna pasa a trata posibel solucionnan pa e aumento drastico di prijsnan di awa y coriente na nivel di famia, na nivel di negoshi, na nivel di e companianan di WEB y ELMAR y na nivel di gobierno y parlamento. 

E posibilidad di cuminsa un of mas caso den corte contra di WEB/ELMAR cu a causa e problemanan aki pasobra no a “hedge”, a wordo discuti cu e abogado Richie Kock cu a trata diferente forma posibel di acerca un caso asina. Den busca solucion pa negoshinan chikito Speijer cu ta doño di un negoshi chikito, den un forma hopi sincero a expresa su preocupacion grandi pa su negoshi y pa su trahadonan.

El a menciona cu e no ta wak kitamento di hende fo’i trabou of baha e cantidad di ora di trabou pa baha gasto, como solucion. “Nan tambe mester por biba normal” el a bisa bon cla. Loke semper ta sosode ta cu ta hisa prijs di e servicio y productonan. Pero esaki lo afecta benta di negoshinan y posibel perdida di cliente. Lejuez a splica cu mester realisa cu e aumento di prijsnan lo nifica cu Aruba ta bira mas caro pa nos mes y pa turistanan.

E miho caminda pa cana ta pa negoshinan grandi y chikito uni y pidi pa gobierno y parlamento scucha nan y tene cuenta cu nan. Negociantenan mester realisa cu ta hunto so nan por haya solucion. Finalmente a discuti e solucionnan na nivel di WEB/ELMAR y na nivel di gobierno/parlamento. For di e cantidad grandi di expresionnan di sala a sali bon cla cu e unico solucion cu ta wak ta pa gobierno cambia su maneho drasticamente y lihe of baha mas lihe posibel pa duna Pueblo e oportunidad pa scoge un gobierno cu si por trece solucion y cu ta goberna pa henter pueblo. A pesar di tur e preocupacionnan, a cera e anochi di discusion constructivo aki den un ambiente di optimismo.