AVP: Durante simposio a establece pensamento idealistico nobo

Diahuebs 22 di september 2022, Fundacion Digna Laclé Herera, Plataforma hobenan profesional y fraccion di AVP a organisa un simposio sumanente exitoso, cu a establece un pensamento idealistico nobo cu lo forma e base pa e desaroyo di nos comunidad. Dilanti un auditorio yen di interesado y varios personahe clave den nos comunidad representando e sector social, sindical, comercial y e sector di enseñansa a lansa e tema   “Restauration of the Common Good”. (“Bon Comun”) Un elenco di orador no-politico invita, for di diferente sector di nos comunidad y diferente angulo spiritual, cada uno a presenta un punto di bista y nan experiencia cu e concepto di “bon comun”. Esaki a percura pa un experiencia sumamente original y cu ta invita pa sa mas, pasobra cu e ta duna un criterio y un direccion diferente pa desaroyo di comunidad.

Den e apertura di e simposio e hoben studiante Wendrick Cicilia, miembro di Plataforma Hobennan Profesional, a duna un bista di e concepto di “bon comun” y e necesidad pa recupera e norma- y balornan importante manera civismo, solidaridad, empatia y amor pa prohimo. E concepto di “bon comun” no ta uno nobo, pero den un tempo di decadencia y desesperacion e ta un pensamento cu ta duna speransa. 

Pastor Calix Ashby den un reflexion elocuente a mustra con “bon comun” por sirbi como un compas moral den nos bida y den nos trabou den comunidad, manera el a sirbi den pasado. Un bon compas ta guia bo den tur situacion. Citando varios texto biblico Pastor Calix Ashby a subraya e responsabilidad comun cu nos tin di cuida un pa otro, y duna contenido na e bon comun den nos relacion cu nos famia, amistad y bisiña. 

Docente constitucional di Universidad di Aruba, Luciano Milliard, a duna un disertacion sumamente interesante riba “Bon Comun y e derecho riba enseñansa”. Obviamente un area sumamente importante pa bida diario den nos comunidad. Enseñansa ta mas cu formacion intelectual, pero ta oportunidad pa un persona alcansa su deseonan di mas profundo. Enseñansa no obstante cu mester ta accesibel, e mester forma un comunidad y capacita un comunidad pa asina garantisa un desaroyo continuo y un futuro prometedor pa Aruba. 

Un di e oradornan hoben tabata e studiante di di dos aña di Harvard University, Mimi Koenig. El a papia di “Common Good one act at a time. Moving young generation from an “I” to a “We” society”. Esaki ta un tema cu ta interesa e hobennan en particular pa motibo di e aparente falta di interes di e hobennan den asuntonan general di comunidad. E generacion nobo ta wordo cualifica como e generacion indiferente pa locual ta pasa nan alrededor, y no ta realisa nan potencial pa contribui na un miho comunidad. E concepto di E Bon Comun lo inspira e generacion nobo, pa participa activamente den e procesonan di cambio y mehoracion di nos pais.

E hoben empresario y Business Management Professional  na Aruba, Marlandi Gracia a splica con e ta aplica e pensamento di “bon comun” den e empresa di su famia, mustrando cu por aplica esaki den economia tambe. Economia mester produci fruta pa tur cu ta biba na Aruba. E mensahe importante comunica pa Marlandi Gracia ta cu e mundo empresarial mester realisa cu nan tin un responsabilidad social  pa contribui na crea un miho comunidad. E mentalidad di explota nan empleadonan simplemente pa genera mas ganashi no ta cuadra cu e concepto di BON COMUN, ta momento pa inverti den mehor ambiente y condicional laboral pa nos empleadonan. 

E conocido domi Peter Hazenoot a elabora den forma bunita riba e “Bon Comun, Comunidad, Solidaridad y Responsabilidad”. Esaki a ilustra e responsabilidad cu nos tur tin pa loke ta pasa den nos comunidad.

Ex-prome minister di Aruba y lider di partido AVP, mr. Mike Eman a papia riba “Bon Comun, e Causa Comun y politica di Speransa”. Den un forma original el a ilustra cu ehempel concreto cu e pensamento di “bon comun” no ta un utopia, algo bunita cu lo no ta alcansabel. E ehempel cu mas a atrae atencion ta di Etty Toppenberg d.f.m. cu a uza su talentonan musical y di canto pa entretene hende pa añanan largo sin busca fama of reconocemento personal. E interes di comunidad ta loke a inspir’e. Locual a keda resona den e mente y curason despues di e discurso di ex-prome minister di Aruba y actual lider di partido AVP ta e echo cu nos tin e hendenan y e capacidad pa nos realisa e BON COMUN pa nos Pais. mr. Mike Eman a reconoce mas persona den e sala cu a mustra di tin e Bon Comun na pecho, manera famia John Fun, e hoben entrepreneur Terrance Ras, e pareha Anthony Geerman, trahadonan incansabel pa bunitesa y limpiesa di Aruba, Jerry Schwengle cu a compaña Rolly Bislick riba su hazaña pa realisa un Piscina Olympico pa Aruba, Josephine Albertus, sindicalista luchador cu curashi, alma y curpa.   

Finalmente Pastor Jairo Maduro a mustra cu e “bon comun” ta en esencia e reconocemento di “dignidad humano”. E ta un forma di traha cu nos por aplica den tur ramo di trabou y bida y ta enrikese bida diario. Un reflexion spiritual a cautiva e atencion di creyente y no creyente presente den e auditorio. 

E simposio a mustra cu tin forma di pensa y traha cu contrario na loke nos ta wak tur dia, ta duna speransa cu nos por biba, traha y crea un comunidad cu ta duna dignidad humano un luga central y cu ta tene cuenta cu tur hende en bes di previlegio pa algun so.

Fundacion Digna Laclé Herera ta contento cu e recepcion di e concepto “bon comun” y e exito di e simposio. Pronto lo anuncia e siguiente actividadnan riba e tema importante aki.