AVB tambe a celebra Dia Internacional di Hende Muhe

AVB a celebra dia Internacional di Hende Muhe en grandi cu inauguracion di e minivan di Academia Damas y wega amistoso entre e damanan presente

Diaranson atardi riba Dia Internacional di Hende Muhe, Arubaaanse Voetbal Bond a inaugura e minivan di Academia Dama.

E miembronan di Directiva, Mildred Wever y Rosemin Croes a corta e sinta cora y Geetanjali Khemlani a batisa e minivan. Alabes e 18 hungadonan cu a gana e “Premio Excelencia den Deporta” a ricibi giftcard di AWG 500,- pa asina gosa di tremendo trabou cu nan a desplega den CFU Challenge Series na 2021.

Despues di inauguracion tur presente tabata invita pa pasa riba veld pa algun wega amistoso entre tur e damanan presente. A forma diferente team nan, incluyendo un di e damanan di Academy U-14 & Open y e damanan di diferente clubnan manera Bubali, La Fama y Riverplate y asina dama nan a bataya contra otro riba veld, sigur un anochi masha placentero. Na final di e anochi, a haci e entrega di e premionan na e cuater diferente ganadonan cu tawata encera dos day pass pa RUI Palace y tambe souveniers di Arubaanse Voetbal Bond.

AVB ta sumamente contento con e evento a bay y asina a celebra en grandi e Dia Internacional di Hende Muhe, gradiciendo tur cu a asisti.

“Na tur e futbolista nan femenino, e coach- y fanaticonan eyfo: bo ta un forsa poderoso di cambio y inspiracion. Bo pasion, dedicacion y trabou duro a yuda habri e caminda pa e futuro generacion di mucha muhenan pa soña den grandi y alcansa nan soñonan, tanto riba veld como pafo di veld. Nos ta orguyoso di a para cu boso den e guera pa igualdad di genero den deporte y mas aleu. Laga nos sigui traspasa barera y kibra stereotipo nan y mustra mundo kico un hende muhe por ta capaz den futbol. Sigui cumpli cu boso obhetivo, kibrando barera y inspirando e siguiente generacion di atletanan femenino.”