AVB ta orguyoso di e presentacion di U-17 na Merca

Diabierna seleccion di U17 a regresa fo’i Merca, unda nan a participa den campeonato di CONCACAF. Na salida famia orguyoso di nan presentacion tabata warda riba e hungadonan.

Randolf Lacle, presidente di Arubaanse Voetbal Bond (AVB), a indica di a ricibi e seleccion U17 despues cu nan tabatin compromiso pa CONCACAF na Tampa, Merca. AVB tabata orguyoso di nan presentacion y tur hende cu a mira e wega, por a disfruta di un bon nivel di futbol cu e seleccion a demostra. Esey ta mustra tambe e crecemento cu nan a pasa den dje. Aña pasa nan a hunga como U15 den e torneo di Republica Dominicana.

E aña aki nan a topa algun ekipo di categoria mas halto. Asina mes e nivel di futbol cu nan a demostra, a laga AVB cu hopi satisfaccion y e staff a haci un bon trabou cu nan. Lacle a indica cu no solamente nan ta mira esey, pero CONCACAF of e persona cu ta bin di FIFA a informa cu AVB ta bayendo bon cu e parti di seleccion. E seleccion a gana tres wega, cual victoria ta bon mereci y hunga. E ultimo wega tabata contra Puerto Rico, cu ta uno hopi fuerte.

Tabata di lamenta cu e seleccion no por a gana nan, pero a empata. Pa motibo di empate, esey a pone cu Aruba a termina na mesun punto cu nan. Pero Puerto Rico tabatin miho diferencia di gol cu Aruba, nan a pasa y Aruba e termina elimina.

Pa un relato mas amplio, lesa TREMPAN.