Avance den digitalisacion mester di transicion completo di aparato publico

Pa Aruba por yega un dia na cumpra papel di cinco florin di censo for di e comodidad di su cas of trabou, mescos ta e caso cu registro  di Camara di Comercio, tin mester pa tur departamento di gobierno ta riba e mesun sistema. Esey ta algo cu hefe di Registro Civil y Censo, Sharin Luydens, no ta completamente sigur cu nos tac la p’e aworaki.

“Mi por subi Kamer Van Koophandel paga e papel di otro hende, pasobra e ta un registro publico. Registro Civil no ta un registro publico pasobra tin leynan di privacidad. Kier men cu ora ta papia di digitalisacion, mester tin un number unico y un identificado unico,” Luydens a indica argumentandocu mester ta manera un banco. “Esey no tin den gobierno awo. Ningun hende no por subi cu un unique number y su identification system pa drenta portalnan di gobierno pa pidi un papel di 5 florin.”

Mas aleu, e director a bisa, no tin tampoco e manera di pago pa ricibi e documento digitalmente cu un QR-code den bo email. “Bijvoorbeeld esey bo lo kier logra; cu un dia ami por subi cu mi unique number y mi autentication. E por ta pin, e por ta ki sorto di authentication system cu ta. Cu mi ta drenta y e sistema sa: Ok, Sharin Luydens a drenta. Ami ta pidi e papel di 5 florin. Ora mi pidi’e, mi por page tambe via mi cuenta di banco y mi ta pone e email e ora. E ora ey, pa mi haya e papel digital den mi email, bo ta haye cu un QR-code.” E hende por mustra su papel di 5 florin, ta scan e QR-code y ta wak cu e ta un papel autentico. E QR-code ey ta bisa cu ta dura 6 luna, pasobra despues bo tin cu paga pa un nobo.

Sistema asina por y ta existi na mundo, segun Luydens, pero Censo no por haci’e. Ora ta papia di unique number y autenticacion system riba nivel di pais, ta algo hopi grandi. E ta algo cu ta rekeri tambe hopi capacidad tecnico y e funcionario no sa si tur e capacidad tecnico t’ey y e security system cu mester rond di dje.

A conta cu Hulanda mes ta luchando cu nan Burgerservicenummer (BSN) y ta reevalua esaki pasobra tin hende cu dos BSN, caminda a bay Hulanda y belasting ta duna nan un BSN, pero despues gemeent tambe a duna nan un otro BSN. Luydens: “Fraudenan asina por sosode. Esey bo no kier. Dus bo tin cu siña di e foutnan cu a haci na Hulanda.Wak e bon, pasobra nan mes ta evaluando e sistema aki.”Asina mes, ta bisa cu e no mester ta un BSN number, pero e mester ta un unique number si. Y ora bo ta papia di un unique number, bo tin cu pensa: ken ta genera e unique number? Paso na Hulanda ta Rijksdienst van Identiteit Gegevens cu ta un rijksdienst cu ta ariba di e gemeentenan y e rijksdienst ta suministra e gemeentenan e unique number ey pa ora un hende bin y registra, ta acopla e unique number na e hende na Aruba. Cua organisacion lo haci e tarea ey? Ta preguntanan cu bo tin cu bay haci bo mes y inventarisa hopi bon con bo ta yega na esaki, e director di Censo a finalisa bisando.