Atrobe mal tempo a gara Aruba di sorpresa

Diaranson den dia tabata marca pa un caida considerabel di awa den poco tempo, loke a ocasiona un asina yama na Ingles ‘flash floods’ den varios bario di nos isla.

Si esey no tabata suficiente, a registra un hos den districto di Santa Cruz cu a spanta varios persona y ranca dak di un cas. Reportero di 24ora a yega na e sitio, sin embargo e habitantenan no tabata desea di duna declaracion. Solamente a indica cu lo cuminsa di biaha cu e trabou pa reemplasa e dak.

Mientrastanto, Servicio Meteorologico no a emiti ningun informacion. Den e informe di diamars atardi, valido te diaranson atardi, tabata indica un posible caida di awa di entre 1 pa 5 mm.

Sinembargo 24ora.com a papia cu conocedo di e tema, kende a splica cu horcan Fiona a bay cu tur biento di e region, lagando atras un debilidad. Su tras tin tormenta tropical Gaston cu ta drentando Caribe y tambe su tras, un ola tropical cu chens grandi desaroya den un tormenta den e proximo dos pa cinco dia.

Varios actividad rond di e isla a keda afecta pa esaki, en particular den area di Oranjestad caminda tabatin bishita di dos barco crucero grandi. A compronde cu na e mercado dilanti di DIMAS, Local Market, tambe a confronta problema pa motivo di awasero.

E ultimo informe emiti pa e departamento di Meteo Aruba, pa 6’or di diaranson atardi y cu ta duna pronostico pa e proximo 24ora, ta papia solamente di diferencianan ainda chikito di presion di aire den Caribe cu ta wanta e biento zwak te modera. Esaki, den combinacion cu humedad y calor ta percura pa awasero breve cu chens di strena y lamper, indicando tambe cu e awa aki por ta modera te pisa y causa molester. Cu ta exactamente loke e informe di ayera tambe a bisa.