ATIA: Nos kier mira nos leynan laboral rib’e nivel cu tur pais den Reino Hulandes

Aruba Trade and Industry Association (ATIA) a tuma nota siman pasa cu sindicatonan a vocifera nan disgusto riba e proceso tocante e “Congreso Nacional riba ley laboral”. Como gremio comercial, ATIA a sugeri, pa sigui cu e presentacionnan di e experto riba e recomendacionnan di e reforma laboral (E1) y tambe siguridad social (E4), di e “Landspakket”. Alabes tambe bin na un fecha nobo, hunto cu e sindicatonan, unda si lo por dialoga pa yega na un solucion correcto pa nos isla.

Ley Laboral igual

Como gremio nos lo kier mira nos leynan laboral riba mes un nivel cu tur pais di Reino Hulandes. E reforma di nos ley laboral cohuntamente cu e ley di siguridad social mester percura pa nos economia bira uno mas productivo y progresivo den nos region. Un mercado laboral cu siguridad cu tin trabou pa tur Arubiano cu kier y por traha. Como comunidad nos tin cu corda cu un economia ta depende di ambos e dunado di trabou y tambe e empleado, un no por biba y traha sin e otro. 

Contract temporal

Con pa haci nos economia uno mas robusto, productivo pero alabes mas agil ta pa kita e rekisitonan di e articulo 614a di Burgelijk wetboek II, e famoso articulo 1613x bieu cu ta data di aña 1992, pues 30 aña pasa. Sindicato a bin cu un ponencia cu lo tin un “proeftijd” di dos aña. Esaki no ta corecto. Loke si por pasa ta cu awo un dunado di trabou por duna un contract pa 1 aña y extend’e pa 1 aña mas y despues e empleado lo ta “vast in dienst”. E proeftijd lo keda 2 luna pasobra esey ta ancra den ley y no por cambia esey. Awo e ley ta dicta cu por duna un contract temporal pa periodo solamente unda tin mester di ayudo extra y solamente 3 biaha den 2 aña. E excepcion aki a bin di temporada Aruba tawata conoce “high season” unda por tuma un persona pa e periodo ei di solamente 5 luna. En berdad, Aruba no conoce “high season” mas manera den pasado pasobra grado di ocupacion n’e hotelnan ta consistente henter aña. Awo lo tin un oportunidad pa tuma un persona cu un contract di 1 aña y extend’e un biaha. Pues den dos aña e empleado tin trabou pa 24 luna en bes di 15 luna total. Kico abo como empleado lo prefera?

Mercado agil y productivo

Esaki lo haci nos mercado uno mas agil y productivo, unda e companianan lo por expande mas facil creando mas posicion. E meta ta pa tin trabou pa tur hende, esey ta loke kiermen “job security” (siguransa di trabou). Remarcabel ta cu den LMA di Gobierno SI tin posibilidad di contract temporal, pero pa sector priva no. 

Como gremio nos kier anuncia cu nos lo bay den e dialogo “den buena fe” manera ta wordo bisa, pa por yega na un solucion cu lo hiba Aruba su economia y tambe como pais dilanti.