ATA a entrega cuenta anual: A surpasa tur expectativa den 2022

Diamars Minister di Turismo y Salud Publico, Dangui Oduber, a ricibi e cuenta anual 2022 for di Aruba Tourism Authority (ATA). Esaki a wordo entrega por medio di nan CEO, Ronella Croes, hunto cu e hunta di supervision. Minister Oduber a menciona cu e ta satisfecho cu e resultado y prestacion di ATA den ana 2022. Danki pa cumpli cu tur procedura legal y entrega e cuenta anual den e tempo stipula pa ley.

Minister Oduber a sigui bisa cu aña 2022 tabata un aña hopi fuerte pa turismo di Aruba. Aruba a conoce un recuperacion di su turismo di casi 100% di su turismo stayover den comparacion cu aña 2019. Por a nota esaki den e cantidad di tirista stayover cu ta bishita nos isla, tambe por a nota esaki den e prestacion di e hotelnan, manera na e average daily rate y tambe den e RevPar cu tabata edun mas halto den historia.

Aña 2022 tabata un aña excelente pa turismo y esaki bo por mir’e bek den entrada di Gobierno door di e crecemento economico y den e ‘tourism receipt’ publica pa Banco Central. E tourism receipt ta un indicado hopi importante cu ta midi e calidad di turista cu ta yega Aruba. Den aña 2022 maske cu a ricibi menos turista stayover cu na aña 2019, tog e tourism receipt a crece cu 118% na casi 4 biyon florin (e cantidad di placa cu turistanan ta laga atras den economia).

Esaki ta sigur un tremendo resultado di ATA cu gobierno di Aruba tambe ta haya un pida di e bolo. E plan di mercadeo di ATA ta duna un resultado excelente. E campaña nobo di mercadeo titula “The Aruba Effect”, ta enfoca pa e turista no bin Aruba solamente pa nos clima y pa nos beachnan pero pa un experiencia total. Uzando tur e atraccionnan nobo y inversionnan haci pa mehora producto Aruba conforme e maneho di Ministerio di Turismo.

Minister Oduber a indica cu su maneho di turismo ta dirigi na trece turismo di calidad, e turista afluente cu tin un entrada di mas di 150 mil dollar pa aña. Ta sigui enfoca den diversificacion di nos turismo. Keda haci inversion continuo den producto Aruba. Keda enfoca den strategia nobo di mercadeo pa asina keda mas competitivo.

E mandatatio por mira bek riba un aña 2022 hopi exitoso pa ATA. Minister Oduber a gradici e gerencia di ATA pa e bunita resultado aki. Tambe a felicita e hunta di supervision di ATA pa e bon cooperacion y supervision cu nan ta haci den maneha e fondonan di ATA na e miho forma. Sigur palabra di gratititud grandi pa tur departamento di gobierno pa tur esfuerso pa atende turistanan y tambe tur esnan cu ta traha tur dia den e industria aki. Nos hendenan ta e ‘asset’ di mas grandi cu nos tin!

Ta existi un bon sinergia entre ATA y Ministerio di Turismo, pa asina ATA ehecuta e maneho di Ministerio di Turismo conforme e ley di ATA. Danki na e bon cooperacion aki Aruba tin un aña grandi na 2022 y cu hopi anticipacion pa aña 2023 cu ya den e prome kwartaal ta superando cifranan di aña 2022.