Asosashon Tráfiko Sigur Kòrsou ta siguí ku nan meta pa konsientisá usuarionan den tráfiko kon pa komportá den tráfiko.
Willemstad – Den e afán pa sigui kontribuí na un tráfiko sigur, Asosashon Tráfiko Sigur Kòrsou ta siguí ku nan kursonan di konsientisashon. Mirando e kantidat di aksidentenan ku ta tuma lugá i tambe e meta di ATSK, e aña aki ATSK a kuminsá ku un proyekto pa duna kursonan di motivashon i konsientisashon na organisashonnan i tambe kompanianan ku ta tráfika hopi riba nos kareteranan.
Den e siman di seguridat den tráfiko, esta 16 di ougùstus 2022, e proyekto aki a start, kaminda Stichting Wit Gele Kruis tabata e promé organisashon ku a risibí e kurso aki. E kurso ta hiba di titulo “Na kaminda pa un tráfiko MAS sigur”. E kurso a dura 8 siman i durante di esaki e énfasis tabata riba kon usuario mester komportá den tráfiko. Den e kaso spesífiko di Stichting Wit Gele Kruis a pone tambe mas atenshon kon pa transportá hende ku tin mester di èkstra kuido. Un kantidat di 20 shòfùr a haña nan sertifikado di partisipashon.
Riglène Cristina kordinadó di e kurso a indiká, ku ATSK ta sumamente kontentu kon ansioso i entusiasmá e kursistanan tabata i kon aktivamente e kursistanan tabata partisipá na e lèsnan. “Aworaki ta finalisando ku e kurso di “Veilig Verkeer”, pa esnan intresá pa traha den transporte públiko, i na momento ku nos kaba ku esaki, nos start mesora ku e di 2 temporada di e kurso di motivashon. Asina nos ta kompletá i sera 2022. Naturalmente asina aña habri, lo bai tin sekshonnan habrí pa pèrsonanan individual tambe por partisipá na nos kurso”.
*************************************************************************************
**Riba e fotonan athunto por mira na momento ku señor Raymond Vornis ta entregá e sertifikado na 2 di e kursistanan i tambe e grupo kompletu kompaña pa direktor di Stichting Wit Gele Kruis i representante i dosentenan di ATSK.
