Asociacion di Accountants a tene debate riba ‘Con pa conecta contabilidad cu sociedad’

Diamars anochi Arubaanse Vereniging voor Accountants (AVA) den cooperacion cu Universidad di Aruba su instituto pa Good Governance & Leadership y facultad di Accounting, Finance yMarketing a tene un debate tocante ‘Con pa conecta accountancy cu sociedad’. Prof. dr. Mirko Noordegraaf, professor extraordinario di Governance & Public Services na University of Aruba (UA), Paul Vandormael, Decaan di facultad di Accounting, Finance yMarketing y Jonah Warner, miembro di directiva di AVA, a duna presentacion y dirigi e debate cu e stakeholder- y accountantnan presente.

Durante e presentacion a toca e topico cu, door di varios factor, e debate publico ta pone presion pa tin mas regulacion ariba e sector di Accountancy. AVA a splica cu na Aruba e presion pa trece regulacion ta creciendo door di presion di Hulanda. AVA ta lamenta cu tempo di a introduci e Burgerlijk Wetboek di Aruba, na ultimo momento toch a kies pa no inclui un controleplicht pa compania grandi na Aruba, cual door di nan grandura ta importante pa e comunidad, empleado, y banco, si e transaccionnan no wordo ehecuta segun e reglanan di bon maneho.

Den e ultimo añanan, AVA ta reuni regularmente cu stakeholdernan y ta wordo pidi pa input profesional ora cu ta toca topico manera e reforma fiscal, legislacion nobo, manera e Landsverordening Normering Topinkomens y Corporate Governance, como tambe e protocolnan di control relata na e recorte di salario den periodo di Covid.

E Community Talk tin como un obhetivo pa habri posibilidad pa dialoga cu stakeholdernan riba diferente topico. Combersacionnan ta yuda trece e perspectivanan nobo y diferente. E directiva di AVA ta contento cu un evento exitoso y AVA ta compromete su mes pa sigui organisa eventonan y charlanan den futuro pa ofrece nan miembronan y stakeholdernan mas perspectiva aportando na comunidad di Aruba. Tambe representantenan di Universidad y studiantenan presente a mira varios oportunidad pa studiante como parti di nan estudio por asisti AVA cu diferente proyecto.

E proximo‘Community Talk’ planea lo ta uno specifico pa entusiasma studiantenan den rango di accounting y finance pa informa nan tocante e posibilidadnan pa sigui studia pa haya nan certificacion di Register Accountant (RA), Accountant-Administratieconsulent (AA), of Certificied Public Accountant (CPA). E evento lo tuma luga na Universidad di Aruba dia 10 di november. Pa registracion por tuma contacto cu e Secretario di Board di AVA via e-mail ([email protected]).