Asina gobierno ta empodera hende muhe riba nan dia

E ta un dia hopi special pa tur ser femenino. Algun ta ricibi regalo, otro un cena romantico y pa gobierno; un dia yena cu video cu mensahe bunita. For di algun dia caba a nota con prome minister di Aruba ta sacando diferente video riba e pagina di gobierno den cuadro di Dia di Hende Muhe. Ta stimula tur hende muhe pa ta fuerte, pa yuda otro y pa empodera otro. Algo cu mas bien ta na su luga.

Di otro banda ta hopi importante pa mira kico ta pasa henter aña cu hende muhe, specialmente den politica. Di berdad ta yuda otro? Di berdad ta empodera otro? A nota cu prome minister a bisa den un di su videonan: “no paga luz di otro, tur hende tin cu briya.”

Den un resumen, headlines group a pone un fragmento con hende muhenan den politica ta trata otro, specialmente gobierno. Un di esunnan cu mas ta papia pa empodera otro ta Prome Minister, mr. Evelyn Wever-Croes

Den e video ta nota con e prome mandatario y su colega ta ofende, tilda y chercha di contricantenan den parlamento, specialmente hende muhe. Algun frase cu prome minister y minister di finsansa a bisa ta: “bo basora a pasa tur caminda”, “unda bo cabes ta?” “bo saya ta mucho cortico”, ta yama otro parlamentario opositor pa “la llorona” of pa “maribomba”, asina por sigui menciona. For di Prome minister no ta scucha mucho diferencia, ta yama otro pa “un berguensa pa bo pais”, “ken ta bisti pidjama limpi of no”, “e muchanan ‘ki” y mucho mas. Den un di reunionnan den parlamento a scucha ora prome minister a referi na e parlamentarionan den oposicion na nan nomber, cu, cada biaha cu e menciona nan nomber, Minister Xiomara Maduro ta grita “loco” tras di nan nomber. En fin, un sin fin di insulto.

Claro, for di oposicion direccion di gobierno tampoco ta diferente. Ta yama prome minister pa gañado, sinberguensa, ladron, bende patria y mucho mas. Na final ta bon pa remarca si un dia asina, si di berdad ta fungi como empodera of stimula otro hende muhenan den posicion clave, of si ta djis un show politico? Un pregunta cu cada persona por contesta pa nan mes.