Aruparking ta riba un racha: A sticker auto di Mervin Wyatt

Mescos cu algun dia pasa a plak sticker riba auto di parlamentario di MEP, Ricky Hoek, awe a toca turno na parlamentario di AVP, drs. Mervin Wyatt-Ras. Pero e diferencia ta cu Wyatt a haya sticker siendo para den parkeerplaats di Parlamento di Aruba.

E Miembro di Parlamento ta admiti si di a haya un carta di Aruparking den cual nan ta solicita pa parlamentarionan manda nan number di auto pa nan por tin e den file. E no a haci esey, pues e controlado a topa cu su auto sin sa cu ta di dje, pa cual a opta pa plak hn sticker di aviso na su bentana di chauffeur.

E Miembro di Parlamento a sigura cu awo si el a manda su number di auto aden pa nan tin e nota den e file di Aruparking. Di e forma ey lo evita mas problema cu parkeo den futuro.

Mester menciona cu expertonan ta sigura, cu e borchi poni dilanti Parlamento di Aruba indicando cu ey ta parkeerplaats pa parlamentario so, no ta sirbi. Experto di ley di trafico ta sigura cu e borchi ey no ta aparece den ley di trafico di Aruba y como tal, si nan duna bo multa of bay cu bo auto djey, cu bo por keha esun cu hacie dilanti hues. Pa e tin validez, e mester ta e borchi cu e letter P indicando cu ta prohibi pa parkeer anto abou e borchi chikito skirbi cu ta haci excepcion pa parlamentario. Esun poni awo, segun conocedonan di ley di trafico, no ta aplicabel y como tal no ta valido aki na Aruba.