Aruban Warriors/Movemento Indigena Arubano: Derecho di Naturalesa ta parti esencial di pensamento indigena

Diasabra ultimo a tuma luga un conferencia insolito. Minister di Naturalesa Ursell Arends a start su campaña politico pa purba scapa caida inevitabel di su partido. 

Aparte di un par di candidato den su circulo cu a haya chupabebe, niun hende no ta kere mas. Desde cu el a join MEP, el a ‘see the world’ y mientrastanto naturalesa na Aruba ta wordo destrui mas cu nunca. Ursell a bay di acuerdo cu EAGLE LNG-pipeline y cu mas hotel bou gobierno di MEP/RAIZ.

Na 2017 e nativonan indigena a hiba un lucha feroz contra un pipeline na Merca. Protestanan grandi a tuma luga na Standing Rock contra e pipeline. Nos ta asumi cu Ursull a keda keto na UN tocante e EAGLE LNG pipeline bou su gobierno na Aruba paso e indjannan lo a core cu ne di e sala di conferencia y/of lo a yena su curpa cu flecha figurativo. Sigur e no a conta nan tampoco cu su colega Dangui ta destrui nos tera sin piedad den nomber di progreso. Pero desaroyo pa ken? Pa su circulo intimo? Pueblo no ta sinti cu tin progreso den nos cartera y riba dje nos pais ta wordo destrosa y prostitui pa probecho personal.

Ademas, Derecho di Naturalesa ta forma parti esencial di e pensamento indigena. Respet pa naturalesa ta prevalece riba cualkier beneficio capitalista. Nos no por come placa.  Gobierno no ta ni capaz di reenforsa nos leynan actual di naturalesa corda pa reenforsa un ley mas compleho. Y nos ta puntra nos mes ta ken te famoso stakeholdernan? Niun ambientalista ni NGO real a wordo invita. Solamente algun wanna be activista oportunista cu ta manera cameleon; esakinan ta haya puesto clave bou tur gobierno. Nos tur conoce e tipo di hendenan aki y sa ta ken nan ta. Nan sa exactamente con pa maniobra den sombra di mandatarionan, sunchi nan pia manera catibo y carga nan tas.

Nos di Aruban Warriors/Movemento Indigena Arubano ta mira algun desaroyo basta preocupante ta tumando luga den gobierno MEP/RAIZ. Tur cos ta hole malversacion di placa publico y/of di fondo internacional destina na pueblo indigena Arubano. Y e problema ta surgi ora cu despues cu gobierno baha, pueblo mes mester paga pa OM por investiga posibel corupcion cu a tuma luga cu nos placa. Niun hende ta scapa su destino.