Aruba Tourism Authority ta organisa e di dos edicion di: ‘Aruba Signature Experiences’

Expectativa y necesidad di e bishitantenan a cambia den transcurso di e ultimo añanan unda e bishitantenan ta mas enfoca riba experiencia unico cu den pasado. Despues di e pandemia esaki a bira mas importante ainda ya cu mas hende ta considera vakantie como un oportunidad pa crea recuerdo inolvidabel hunto cu nan sernan keri.  

Durante e celebracion di dia di turismo 2021, A.T.A. y Qredits Aruba a anuncia e programa ‘Aruba Signature Experiences’ cu e meta pa curasha entrepreneur pa enfoca riba experiencia unico y inolvidabel pa nos bishitantenan. Despues cu a anuncia e ganadonan di e prome trayecto aki den luna di maart 2022, e di dos edicion lo ta cuminsando pronto.  

A.T.A. y Qredits Aruba ta invita e personanan cu kier bira entrepreneur of ta entrepreneur caba, cu tin un idea innovativo pa un experiencia unico den e areanan di romance, bienestar, eco-turismo, of cultura, pa participa den e programa aki. 

E entrepreneurnan nobo lo mester participa na e Small Business Academy di Qredits Aruba, unda cu nan lo siña diferente habilidad necesario pa cuminsa y maneha nan propio negoshi. Despues di completa e curso aki e entrepreneur lo por sigui na e siguiente stap cu ta aplica pa financiamento na Qredits Aruba. 

Entrepreneur existente tambe tin e posibilidad pa aplica pa financiamento directamente na Qredits Aruba y asina bin na remarke pa participa den e programa. 

For di e participantenan lo selecta e ganadonan cu lo ricibi como premio e sosten di Aruba Tourism Authority cu e fondo-, recursonan y guia personalisa, pa asina promove nan producto of servicio unico na nos bishitantenan.

Por registra pa forma parti di e di dos edicion di ‘Aruba Signature Experiences’ na: https://www.aruba.com/registra entre diamars dia 6 di september y diaranson dia 5 di october. 

A.T.A. y Qredits Aruba ta spera cu e programa aki por sirbi como un empuhe pa crea mas experiencianan di calidad pa nos bishitantenan.