Aruba ta uni pa yuda famia Wouters cubri gasto di entiero

Un mayo semper ta biba pensa cu e lo bay prome cu su yiunan. Pero pareha Wouters-Quandt nunca por a biba pensa cu nan lo perde cuater miembro di nan famia den un solo tiro.

Tabata diadomingo ultimo cu a drenta informacion di un accidente hopi serio na Colony, caminda cu e impacto tabata asina duro cu dos adulto, un mucha y tambe un feto a perde nan bida. Un dia cu a cuminsa manera cualkier otro, a termina den desgracia p’e famia.

GASTO

Cu e fayecimento tragico di tres miembro di nan famia, den e caso aki dos yiu y un nieto, famia Wouters a haya nan den un gasto grandi inespera. Gasto di entiero ta core den careda di 25 mil florin, cual financieramente nan no por carga. Un di e victimanan tabata traha y seguro di su compania lo cubri e gastonan di entiero. Pero pa loke ta e gasto di entiero di Mirella (Jennifer), e no tabata traha. E tabata mama di cuater yiu c’un di cinco na caminda y tabata cobra bijstand.

Famia Wouters, den nan tristesa, ta haci un apelacion n’e comunidad di Aruba pa por contribui cu e famia financieramente. Nan no tin e manera di cumpli cu e gastonan cu e entiero ta trece cu ne.

Cualkier donacion, pa con chikito cu e por ta, ta bonbini. Por haci un donacion riba e cuenta bancario di Paulina Wouters-Quant na Banco di Caribe, su cuenta coriente number 828441 01.

Aruba, un famia den dolor, cu perdida di 2 nieto y dos yiu, sigur ta un sla duro pa e famia. Ban duna nos granito di area pa asina yuda e famia aki no solamente cu e gastonan di entiero, pero tambe cu e gastonan cu ta keda atras pa e famia cu lo mester bay zorg p’e criansa di e muchanan. Tata di e yiunan di Mirella no ta traha, pa cual ta e welo y wela lo mester tuma nan over.

Pa loke ta trata e yiu di Joanne (Carolina), e mama tabata tin su pareha pa cual e tata lo tuma encargo over di su yiu.