Aruba Lions Club ta prolonga fecha di rifa di auto

Aruba Lions Club ta conoce e aña aki su rifa di auto cu ta consisti di 5 premio hopi atractivo manera, un  auto electrico pa mucha, un step electrico, un bicicleta electrico, un scooter electrico y cu e prome  premio un auto electrico di famia marca “Changan”. 

E premionan aki sigur ta danki na e compania mas renombra na Aruba pa su medionan di transporte  electrico, cu ta All to Car situa na L.G. Smith Blvd, caminda por pasa admira e autonan aki. Esaki ta un rifa cu den e tempo moderno aki sigur ta bira hopi atractivo pa nos comunidad for di nos  hobennan te na esnan di mas edad. 

Benta di e rifa aki ta bayendo hopi bon den un tempo hopi cortico desde cu Aruba Lions Club a lansa  esaki.  

Den cuadro di nos celebracion di 75 aña fin di luna di september, a dicidi pa stipula un fecha cu nos lo  culmina nos celebracion hunto cu nos pueblo arubano, programa pa diadomingo 2 di october pa saca e  ganadonan di e premionan. 

Pa motibo di hopi preparacion y reunion pa cu nos celebracion di 75 aña hunto cu nos  huespednan, e tempo a bira dificil ultimo simannan pa Aruba Lions Club por a sali cu nan “yellow jacket”  riba caya pa bende e rifa aki, mientras cu e demanda ta halto di personanan cu kier un rifa ainda. Pa e motibo aki Aruba Lions Club a tuma e decision, cu fecha di e rifa cu mester hunga 2 di october, lo  wordo posponi pa diadomingo 6 di november 2022.  

Mientras Aruba Lions Club ta terminando cu su celebracion e siman aki, lo tin mas tempo den e proximo  simannan pa por caba di bende locual cu falta y asina purba cumpli cu tur esnan cu ainda ta pidi pa nan  rifa. Aruba Lions ta purba cumpli y sirbi tur caminda den comunidad y p’esey ta masha agradeci na tur cu  ya caba a cumpra nan rifa y ta pidi comunidad un poko pasenshi cu nos lo jega tur caminda den e  proximo simannan. 

Un biaha mas ALC kier a pidi disculpa pa e incovenencia aki y ta sigura cu pa 6 di november, nos tin 5  ganado di e diferente premionan y cu lo wordo saca via tombola, asina ta cu e number no por keda  aden. Esaki ta un gran oportunidad mirando cu e cantidad di rifa ta limita y ganador(a) lo ta sigura. 

Danki na bo contribucion pa Aruba Lions Club por sigui yuda esunnan den necesidad.