Aruba Harmony Apartments causando daño na nos turismo

E grupo di Colombiano cu a haya nan mes cu problema cu Migracion algun dia atras ta bek na Aruba despues di nan biahe largo pa Dinamarca. Ainda por corda con a detene mas o menos nuebe Colombiano bou sospecho di tin droga den nan poder. Nan a keda casi tres ora cera na warda di polis. Despues di a perde vuelo cu KLM pa Hulanda, na final tur a logra biaha pero ta algun dia pasa cu nan a yega bek Aruba pa sigui cu transito pa Colombia.

Nan ta den problema atrobe. E biaha aki ta cu Aruba Harmony Apartments. E grupo a book nan estadia via e website Booking.com. Na prome instante e pago a cancela segun nan a conta na sitio. E doño di compleho a bisa nan cu e nunca a ricibi e pago. Debi cu a ricibi problema cu e pago, nan a dicidi di bin personalmente y paga e estadia di mas o menos $700. A paga un suma di deposito den euro, pa cual na prome instante no kier a debolbe nan e suma. Na final despues di varios papiamento hunto cu intermediacion di polis, a yega un acuerdo pa nan ricibi nan placa bek.

Ta cuestiona e forma con ta trata cu e huesped. Ta drenta camber di e huesped durante nan ausencia, ta paga airco na cierto orario, ta tilda e huesped di a kibra cierto material den e apartamento y despues kier cobra nan un cantidad di placa. No ta prome biaha cu ta ricibi keho di Aruba Harmony Apartments. E turistanan a denuncia cu riba Booking.com ta mira foto di Royal Plaza comosifuera cu ta ey nan lo keda. Ta spera cu autoridad local atende cu e problema aki, mirando cu ta ricibiendo basta keho di e mesun localidad aki.