Aruba a destaca den ballet na New York 

Durante e siman cu a pasa, e hoben Liselotte van Doorn a representa Aruba den un competencia di ballet na New York. El a sa di gana brons pa e baile  ‘Lilac Fairy’.

For di chikito e ta forma parti di e Koslov Dance Academy. Leonid Koslov, director di Kozlov Dance Academy a splica cu e ta considera Liselotte como un miembro di su famia. For di chikito cu e hoben a cuminsa na su academia, e tabata sa cu e tabata tin tur potencial pa ta un bailarina. Esaki ta algo cu ta tuma tempo. 

Pero ya caba el a participa den tres competencia internacional y den tur tres competencia, el a sa di bin cu premio cas. Kozlov a sigui bisa cu, manera cu el a wak Liselotte den su ultimo competencia, e tabata sa cu e lo ta un ganado. Como maestro, e ta contento di por a logra loke tur maestro kier logra y pa Liselotte, e ta contento cu e hoben por a logra loke tur bailarina kier logra. 

Tabata absolutamente impresionante pa wak un hoben di 15 aña riba escenario di un ciudad grandi y poderoso, manera t’e caso di New York. Tabata tin participantenan for di varios otro pais, pero Liselotte a radica energia y confiansa. 

Liselotte van Doorn a splica cu for di su 6 aña e ta miembro di Kozlov Dance Academy. For di e prome momento Leonid Kozlov a wak potencial den dje. 

Su participacion tabata danki na Prins Bernhard Cultuurfonds cu a haci su biahe pa New York posibel.  

Van Doorn a sigui bisa cu loke ta yud’e hopi ora e ta competi riba un escenario internacional ta, cu e no ta wak e como un competencia, pero mas como un presentacion. E diferencia ta sinta cu ora ta wak e como un presentacion, e energia cu bo ta emiti, ta resalta den e actuacion di e publico tambe. 

Pa mas lesa TREMPAN di mañan.