Aruba a brasa e Carlos Bislip Jazz Expo

Dia 30 di april ta Dia Internacional di Jazz, un dia special pa resalta jazz y su rol diplomatico cu ta uni tur hende rond mudo. E ta designa oficialmente pa United Nations Educational, Scientific and Cultural Organization (UNESCO) na november 2011. 

Aki na Aruba, e aña aki a celebr’e cu e Carlos Bislip Jazz Expo, unda cu a destaca e hende muhe den e mundo di Jazz. Carlos Bislip, organisado a indica cu esaki no ta e prome biaha cu a organisa e evento aki na San Nicolas, pero tabata na 2010 mas o menos, cu a organis’e pa prome biaha na Scol di Arte. Intencion ta pa tur aña e evento tuma luga na un luga diferente. E anochi aki tabata tin cinco presentacion. Tur tabata bandanan local, pero si e tabata tin dos saxofonista Mericano invita, cualnan tabata Ana Nelson y e trompetisa Zoe Murphy. 

Idea tras di e invitacion di e dos musiconan femenino aki ta pa motibo cu Carlos Bislip Jazz Expo pa e proximo cinco añanan lo purba pa enfoca riba e hende muhe den Jazz. E dos musiconan invita ta personanan cu un grado halto den jazz. 

Mas aleu, Bislip a indica cu e ta hopi satisfecho cu e publico cu a atende e concierto aki den curason di San Nicolas. E ta di opinion cu San Nicolas tin potencial pa haci mas di e sorto di negoshinan aki. 

E anochi aki a conta cu presencia di tanto turista como nos hendenan local. 

Un di e organisadonan tambe di e evento aki tabata e musico conoci Ivan Quandus. El a indica cu den e ultimo simannan a bin ta promove e evento di Jazz. Ivan Quandus, musico, a indica cu e evewnto aki ta den su di shete (7) aña cu ta organis’e den cuadro di e Dia Internacional di Jazz. 

Quandus hunto cu Bislip a organisa e prome e concierto di Jazz y e por mira un aumento den asistencia di Jazz. Pocopoco por ripara cu e pueblo di Aruba ta cuminsa familiarisa su mes cu e musica di Jazz. Aunke cu tin tanto concierto, otro sorto di musicanan, toch ta bon pa tin mas opcion pa e publico cu ta prefera algo mas trankilo, algo otro. 

Ivan Quandus no ta un persona desconoci den mundo di musico na Aruba. E ta musico, compositor y areglista den varios genero musical riba nos isla. Tambe el a forma parti di varios banda conoci riba nos isla.