Arthur Vallejo (MEP): Mester proteha pueblo di catastrofe den sector di salud na Aruba

Ultimamente directiva di dr. Horacio Oduber Hospital a informa pueblo di un situacion cu henter Aruba ta bin ta presencia cu hopi dolor, cual t’e dificultad enorme cu ta pasando aden cu e hospital y tambe e proyecto di renobacion y ampliacion.

Durante un conferencia di prensa cu a tuma luga diaranson ultimo, parlamentario di fraccion di MEP, dr. Arthur Vallejo a comenta awo a bin haya sa cu contratista a bandona e proyecto. E cantidad di placa cu pueblo di Aruba lo tin cu paga pa un renobacion di un megahospital p’e proximo 29 aña y cu e interes di financiamento, cada un di e habitantenan di Aruba, lo tin cu paga cerca di 1 biyon florin p’e proyecto aki.

Sigur p’e placa aki, pueblo di Aruba por laga traha dos hospital completamente nobo cu tur ekipo aden.

UN FRACASO

Un proyecto ehecuta p’e boefnan di mas grandi cu e pais aki a conoce. Vallejo a bisa cu e fracaso y complicacion con e proyecto aki ta hinca den otro y tur loke a sosode den transcurso ta tipico di hende cu mentalidad cu definitivamente no tabatin e interes di pueblo na prome luga.

Parce cu sed pa placa tabata na prome luga cu e proyecto aki. Por a mira fo’i comienso di e comienso cu e otorgamento y e proceso di bidding, siendo cu tabatin un grupo cu mas experiencia y menos costo. Pero toch a scoge pa uno sin experiencia y mas costoso. Esaki t’e resultado, segun Vallejo.

Esaki ta pasado cu ta importante pa recorda pueblo. Pero mesun importante ta kico mester haci pa loke t’e futuro y con por bay proteha pueblo di Aruba di un di e catastrofenan mas grandi den e sector di salud den historia di Aruba.

Vallejo a conseha minister di Salud, bisando cu por a scucha mester entrega e proyecto pa final di e aña aki, pero awo tin cu alarga p’e aña siguiente. P’e minister di salubridad ta importante pa ora yam’e pa bay ricibi e famoso yabi y pa bay saca potret, pa no bay haci esaki asina lihe. Pa respet pa pueblo ta importante pa warda un rato prome, e parlamentario a comenta.

HACI EVALUACION

Prome cu esaki mester haci algo hopi importante. Loke Vallejo ta conseha pa haci ta cu mester hacie den prome instancia, incluso cuminsa busca di awo caba, fondo pa un tercer partido evaluado. Un partido evaluado cu no tin nada di haber cu ningun di e stakeholdernan cu a traha riba e proyecto aki. Cu lo bay evalua e condicion di e edificionan y pa bisa den un rapport si di berdad e material y construccion lo wanta  y dura un tempo rasonabel. Tur esaki na interes nacional.

Pa mas informacion lesa TREMPAN.